Ֆին Գերագուսյանը «Սանդերլենդում» իր առաջընթացի մասին

Հեռանկարային 17-ամյա հարձակվող Ֆին Գերագուսյանը շարունակում է զարգանալ «Սանդերլենդի» (U21) երիտասարդական թիմի կազմում։ Վերջերս կայացած Պրեմիեր լիգայի գավաթի խաղում՝ «Վուլվերհեմփթոնի» դեմ, նա դուբլի հեղինակ դարձավ՝ ապահովելով իր թիմի համար կարևոր միավոր լարված հանդիպման ընթացքում։

Հանդիպումից հետո «Սանդերլենդի» պաշտոնական կայքը հրապարակեց ֆուտբոլիստի և նրա մարզչի հարցազրույցը։

Երիտասարդական թիմի գլխավոր մարզիչ Գրեմ Մերթին վստահեց Գերագուսյանին մեկնարկային կազմում տեղ, և երիտասարդ հարձակվողն արդարացրեց սպասելիքները՝ խփելով իր առաջին գոլերը U21-ում։

«Անհավատալիորեն ուրախ եմ, որ ոչ միայն խաղադաշտ դուրս եկա մեկնարկային կազմում, այլև կարողացա երկու անգամ գրավել դարպասը», – խոստովանել է Գերագուսյանը։ «Սա լուրջ փորձություն էր ուժեղ մրցակցի դեմ, բայց ես վայելեցի մարտահրավերը։ Երկու գոլերն էլ հնարավոր դարձան Բեն Միդլմասի և Ջեյդոն Ջոնսի հիանալի փոխանցումների շնորհիվ՝ ինձ մնում էր միայն ճիշտ տեղում գտնվել»։

Գերագուսյանը սկսեց ուշադրություն գրավել դեռևս 15 տարեկանում, երբ նորամուտը նշեց U18 թիմի կազմում՝ Անգլիայի երիտասարդական գավաթի խաղարկությունում։ Այժմ նա շարունակում է իր զարգացումը, ստորագրելով կրթաթոշակային պայմանագիր ակումբի հետ, ինչպես նաև ստանալով հրավեր Հայաստանի Մ19 հավաքական։

«Վերջին երկու տարիներին իմ առաջընթացից շատ գոհ եմ», – ընդգծել է հարձակվողը։ «Ինձ համար ակնհայտ էր, որ կարիերաս պետք է շարունակեմ այստեղ։ Շատ շնորհակալ եմ մարզիչներին իրենց վստահության համար։ Հասկանում եմ, որ դեռ երկար ճանապարհ կա անցնելու, բայց կշարունակեմ քրտնաջան աշխատել, որպեսզի նոր հնարավորություններ ստանամ»։

Գերագուսյանի հասակը 193 սմ է, ինչը նրան դարձնում է վտանգավոր հարձակվող օդային պայքարներում։ Երիտասարդ ֆուտբոլիստը շարունակում է իր մարզավիճակի բարելավումը և հույս ունի ամրապնդել իր տեղը «Սանդերլենդի» U21 թիմում՝ ապագայում ավելի բարձր մակարդակի խաղերում հանդես գալու համար։