«Տորենսեն» «Արարատ-Արմենիայի» դեմ կխաղա առանց Մալիկ Աբուբաքարիի․ պորտուգալական թիմի գլխավոր մարզիչը գնահատել է մրցակցին

Պորտուգալական «Տորենսեն» Եվրոպա լիգայի 4-րդ տուրի՝ «Արարատ-Արմենիայի» դեմ խաղում չի կարող հույս դնել հարձակվող Մալիկ Աբուբաքարիի վրա։ Այս մասին նոյեմբերի 4-ին կայացած նախախաղային մամուլի ասուլիսի ժամանակ հայտնել է թիմի նոր գլխավոր մարզիչ Ժոաո Նունուն։

Մասնագետի խոսքով՝ թիմի կազմում հնարավոր են նաև այլ փոփոխություններ։ Մեկնարկային կազմի վերաբերյալ վերջնական որոշումը կկայացվի վերջին մարզումից հետո՝ հաշվի առնելով ֆուտբոլիստների ֆիզիկական վիճակը։ Աբուբաքարիի բացակայության պատճառը մարզիչը չի հստակեցրել։

Մալիկ Աբուբաքարին Եվրոպա լիգայում թիմի հիմնական հարձակվողն է։ Բացի այդ, նա Պորտուգալիայի առաջնության չորս խաղում դարձել է երկու գոլի հեղինակ։

Ժոաո Նունուի համար առաջիկա հանդիպումը կլինի նրա նորամուտը Եվրոպա լիգայում՝ «Տորենսեի» գլխավոր մարզչի պաշտոնում։ Մասնագետը թիմը գլխավորել է ընդամենը մի քանի օր առաջ։

Ժոաո Նունու. «Մենք մեծ հարգանքով ենք վերաբերվում «Արարատ-Արմենիային»»

Պորտուգալական ակումբի գլխավոր մարզիչն ընդգծել է, որ Հայաստանի ներկայացուցիչներին հեշտ մրցակից չի համարում, թեև բուքմեյքերները հանդիպման ֆավորիտ են համարում «Տորենսեին»։

Նունուն նշել է, որ մրցաշարի մեկնարկից առաջ գրեթե ոչ ոք չէր սպասում, որ իր թիմը միավորներ կվաստակի, սակայն ակումբն արդեն գերազանցել է նախնական կանխատեսումները։

Մարզչի խոսքով՝ գլխավոր նպատակն է պահպանել մրցունակությունը մնացած հանդիպումներում և արժանապատվորեն ներկայացնել պորտուգալական ֆուտբոլը եվրոպական ասպարեզում։

Մասնագետն առանձին անդրադարձել է նաև «Արարատ-Արմենիայի» գլխավոր մարզիչ Մանուել Տուլիպային, որը նախկինում աշխատել է «Տորենսեում»։

Նունուն նշել է, որ լավ ծանոթ է Տուլիպայի՝ ակումբում կատարած աշխատանքին, ինչպես նաև Հայաստանի թիմի ներկայիս ֆուտբոլիստներ Բենի Դիաշի և Խուան Բալանտայի՝ պորտուգալական ակումբում անցկացրած տարիներին։

Մարզիչն իր հայրենակցին հաջողություններ է մաղթել Հայաստանում, սակայն ընդգծել է, որ առաջիկա հանդիպմանը մտադիր է հաղթանակ տանել։

Խավի Վասկես. «Սա հեշտ հանդիպում չի լինելու»

«Տորենսեի» պաշտպան Խավի Վասկեսը, որը նույնպես մասնակցել է մամուլի ասուլիսին, հայտարարել է, որ թիմը լրջորեն է վերաբերվում հայկական մրցակցին։

Իսպանացի ֆուտբոլիստը նշել է, որ պորտուգալական թիմը մտադիր է ագրեսիվ գործել, կիրառել բարձր պրեսինգ, վերահսկել խաղի ընթացքը և պայքարել երեք միավորի համար։

Նա նաև վստահություն է հայտնել, որ «Տորենսեն» կարող է պայքարել Եվրոպա լիգայի փլեյ-օֆֆի ուղեգրի համար։

«Տորենսե» – «Արարատ-Արմենիա» հանդիպումը կկայանա նոյեմբերի 5-ին Պորտուգալիայի Լեյրիա քաղաքում։