«Դեպորտիվո Արմենիոն» սենսացիոն կերպով դուրս եկավ Արգենտինայի գավաթի 1/16 եզրափակիչ

Բուենոս Այրեսի հայկական համայնքի ակումբը՝ «Դեպորտիվո Արմենիոն», իսկական սենսացիա ստեղծեց Արգենտինայի գավաթի 1/32 եզրափակիչում՝ հաղթելով Բարձրագույն լիգայի ներկայացուցիչ «Տալյերես Կորդովային» (3:3, 5-4՝ 11 մետրանոցներով):

Խաղի ընթացքը չբարենպաստ էր «Արմենիոյի» համար․ երրորդ դիվիզիոնի թիմը բաց թողեց երկու գոլ և ընդմիջմանը զիջում էր 0:2 հաշվով։ Սակայն երկրորդ խաղակեսում բեմ բարձրացավ Խոնաթան Նաուել Էրերան, ով ընդամենը հինգ րոպեում ձևակերպեց անհավանական հեթ-տրիկ (50', 53', 55')։ «Դեպորտիվո Արմենիոն» առաջ անցավ՝ ամբողջովին փոխելով հանդիպման ընթացքը։ Այնուամենայնիվ, 75-րդ րոպեին «Տալյերեսը» հավասարեցրեց հաշիվը, և խաղի ճակատագիրը որոշվեց 11 մետրանոց հարվածաշարով։ Լարված սերիայում «Արմենիոն» ավելի դիպուկ գտնվեց և արժանիորեն անցավ հաջորդ փուլ։ Այս հանդիպումը կմտնի «Դեպորտիվո Արմենիոյի» պատմության մեջ՝ կողքին կանգնելով 1980-ականների Բարձրագույն լիգայի հաջող խաղերին։

Այժմ 1/16 եզրափակչում «Դեպորտիվո Արմենիոն» կխաղա ևս մեկ Պրիմերայի ներկայացուցչի՝ «Դեպորտիվո Ռիեստրայի» հետ, որը ներկայումս Արգենտինայի Բարձրագույն լիգայում 5-րդ տեղում է։