Բենուա Պաերը անսպասելիորեն փոխել է կորտը դաշտով․ ֆրանսիացի թենիսիստը խաղում է Մարսելի հայկական ակումբի կազմում

Ֆրանսիական թենիսի նախկին աստղ Բենուա Պաերը, ով 2016 թվականի հունվարին հասել էր աշխարհի վարկանշային աղյուսակի 18-րդ հորիզոնականին, որոշել է զարմացնել սպորտային հանրությանը՝ փոխելով իր մասնագիտացումը։

35-ամյա մարզիկը, ով հայտնի է իր էքսցենտրիկությամբ և անկանխատեսելի վարքագծով, վետերանների ֆուտբոլային պայմանագիր է կնքել և միացել է Մարսելի հայկական համայնքի ակումբի՝ EUGA Ardziv-ի վետերանների թիմին։

La Provence պարբերականի հաղորդմամբ՝ չնայած նրան, որ Պաերը շարունակում է մասնակցել պրոֆեսիոնալ թենիսի մրցաշարերին (ներկայում նա զբաղեցնում է ATP-ի վարկանիշում 575-րդ տեղը), արդեն մի քանի խաղ է անցկացրել իր նոր թիմի կազմում։ Նրա ընտրությունը EUGA Ardziv-ի օգտին պարզ բացատրություն ունի․ «Իմ ընկերը այնտեղ է խաղում։ Նրանց խաղացողներ չէին բավականացնում, նա առաջարկեց ինձ փորձել։ Ես նախկինում էլ եմ իրենց հետ ֆուտբոլ խաղացել ուղղակի։ Ասացի՝ "Լավ, գնացինք։" Արդեն երկու հանդիպում եմ անցկացրել՝ շատ եմ հավանում մթնոլորտը, ամեն ինչ շատ ջերմ է», — պատմել է Պաերը լրագրողներին։

Նրա միանալը EUGA Ardziv-ին, հավանաբար, կգրավի լրացուցիչ ուշադրություն ակումբի նկատմամբ և կավելացնի հետաքրքրությունը թիմի հանդեպ՝ երկրպագուների ու լրատվամիջոցների կողմից։

Աղբյուր՝ armenews.com