Ինտերը հույս ունի Մխիթարյանի վերադարձի վրա. Ինձագին կարող է նրան խաղադաշտ դուրս բերել արդեն Լացիոյի դեմ խաղում

Արդեն վաղը «Ինտերը» իր դաշտում կընդունի «Լացիոյին», և ըստ վերջին լուրերի Ապպիանո Ջենտիլեից, թիմի երկրպագուներին հաճելի նորություններ են սպասվում։ Մի քանի ֆուտբոլիստներ, որոնք նախկինում վնասվածքի պատճառով բացակայել էին, մոտ են վերադարձին։ Խոսքը Բենժամեն Պավարի, Դավիդե Ֆրատտեզիի և Հենրիխ Մխիթարյանի մասին է՝ երեկ նրանք մասնակի մասնակցել են թիմային մարզմանը և այսօր ակնկալվում է, որ կանցկացնեն ամբողջական մարզում։

Իսկ արգենտինացի Լաուտարո Մարտինեսը, ակումբի փոխանցմամբ, շարունակում է վերականգնումը և խաղադաշտ կվերադառնա ոչ շուտ, քան մեկ շաբաթից։

Լրագրող Պասկուալե Գուարրոն հաղորդում է, որ վերադարձած խաղացողների թվում լավագույն մարզավիճակում հենց Մխիթարյանն է։ Նրա խոսքով՝ հայ կիսապաշտպանը արդեն հասել է իր օպտիմալ մարզավիճակին և հնարավոր է՝ Լացիոյի դեմ խաղում ստանա զգալի խաղաժամանակ։

Հիշեցնենք, որ Մխիթարյանը բաց է թողել Սերիա A-ի նախորդ խաղը «Տորինոյի» դեմ (2։0 «Ինտերի» օգտին) ազդրի մկանային գերհոգնածության պատճառով։ Այժմ նրա վերադարձի հավանականությունն էապես աճել է, և մարզչական շտաբը դիտարկում է նրան մեկնարկային կազմում ընդգրկելու տարբերակը։