ԱՄՆ-ում Արման Ծառուկյանին հանել են ինքնաթիռից Ֆիլադելֆիայում կայանալիք մրցաշարից առաջ

Հայտնի հայ խառը մենամարտերի մարտիկ Արման Ծառուկյանը հայտնվել է ԱՄՆ-ում տեղի ունեցած անսպասելի միջադեպի կենտրոնում․ մարզիկին հանել են ավիաչվերթից Լոս Անջելեսից Ֆիլադելֆիա թռիչքի ժամանակ։

Այս մասին X սոցիալական ցանցում հայտնել է լրագրող Ադամ Զուբայրաեւը։ Նրա խոսքով՝ պատճառը թռիչքի ընթացքում հեռախոսի օգտագործումն էր, ինչը, ենթադրաբար, խախտում էր անվտանգության կանոնները օդանավում։

Զուբայրաեւը նաև հրապարակել է տեսանյութ ինքնաթիռի սրահից, որտեղ երևում է տեղի ունեցածի պահը։ Միջադեպը տեղի է ունեցել Real American Freestyle 8 (RAF 8) մրցաշարից մեկ օր առաջ, որը նախատեսվում է անցկացնել ապրիլի 19-ի գիշերը Ֆիլադելֆիայում։

Ինքը՝ Ծառուկյանը, ևս հրապարակել է տվյալ պահը իր ալիքում։

Ծառուկյանը ուղևորվում էր ազատ ոճի ըմբշամարտի մրցաշարին, որտեղ նրա մրցակիցը պետք է լիներ ամերիկացի մարտիկ Յուրայա Ֆեյբերը։ Չնայած միջադեպին՝ մարզիկին հաջողվել է շարունակել ճանապարհը․ ավելի ուշ նա մասնավոր ինքնաթիռով մեկնել է Ֆիլադելֆիա։