Երեք համաշխարհային ռեկորդ և ԿԺԴՀ-ի վեցերորդ ոսկին. ծանրամարտի ԱԱ-2026-ի 8-րդ օրվա արդյունքները

Նոյեմբերի 3-ին Չինաստանի Նինբո քաղաքում կայացավ ծանրամարտի 2026 թվականի աշխարհի առաջնության ութերորդ մրցումային օրը։ Մեդալներ խաղարկվեցին կանանց մինչև 69 կգ քաշային կարգում։ Օրվա գլխավոր հերոսուհին դարձավ ԿԺԴՀ-ի ներկայացուցիչ Սոն Կուկ Հյանը, որը սահմանեց երեք համաշխարհային ռեկորդ և երրորդ անգամ անընդմեջ նվաճեց աշխարհի չեմպիոնի տիտղոսը։

Հյուսիսկորեացի մարզուհին երկամարտում գրանցեց 275 կգ արդյունք (122 կգ՝ պոկում, 153 կգ՝ հրում)՝ թարմացնելով համաշխարհային ռեկորդները բոլոր երեք ցուցանիշներով։

Ընդ որում, Սոն Կուկ Հյանի համար մրցումները սկսվեցին պոկում վարժությունում անհաջող մոտեցմամբ։ Սակայն դրանից հետո նա հաջողությամբ կատարեց իր փորձերը և ավարտեց ելույթը՝ 16 կգ առավելություն ունենալով մոտակա մրցակցի նկատմամբ։

Արծաթե մեդալը նվաճեց նրա հայրենակից Ռի Սուկը՝ 259 կգ արդյունքով, իսկ բրոնզե մեդալակիր դարձավ կոլումբացի Ջուլիետ Ռոդրիգեսը՝ 245 կգ։

ԿԺԴՀ-ի հավաքականի համար սա արդեն աշխարհի առաջնության վեցերորդ ոսկե մեդալն է երկամարտում։ Հյուսիսկորեացի ծանրորդները շարունակում են վստահորեն գլխավորել մրցաշարի մեդալային հաշվարկը։

Օրվա մյուս ուշագրավ իրադարձությունը Կոսովոն ներկայացնող 15-ամյա Էմիլի Իբանյեսի ելույթն էր։ Երիտասարդ մարզուհին սահմանեց յոթ պատանեկան համաշխարհային ռեկորդ և մեծահասակների պայքարում զբաղեցրեց հինգերորդ տեղը՝ 240 կգ արդյունքով (106+134)։

Հատկանշական է, որ Իբանյեսը հանդես էր գալիս B խմբում, սակայն կարողացավ գերազանցել ուժեղագույն A խմբի ութ մասնակցի։

Ծանրամարտի ԱԱ-2026-ի արդյունքները՝ կանայք, մինչև 69 կգ

Պոկում

1. Սոն Կուկ Հյան (ԿԺԴՀ) — 122 կգ (համաշխարհային ռեկորդ)։

2. Ռի Սուկ (ԿԺԴՀ) — 112 կգ։

3. Ջուլիետ Ռոդրիգես (Կոլումբիա) — 109 կգ։

Հրում

1. Սոն Կուկ Հյան (ԿԺԴՀ) — 153 կգ (համաշխարհային ռեկորդ)։

2. Ռի Սուկ (ԿԺԴՀ) — 147 կգ։

3. Ռուֆիդա Ֆաթհի (Եգիպտոս) — 137 կգ։

Երկամարտ

1. Սոն Կուկ Հյան (ԿԺԴՀ) — 275 կգ (համաշխարհային ռեկորդ)։

2. Ռի Սուկ (ԿԺԴՀ) — 259 կգ։

3. Ջուլիետ Ռոդրիգես (Կոլումբիա) — 245 կգ։

Նինբոյում ընթացող ծանրամարտի աշխարհի առաջնությունը կավարտվի նոյեմբերի 8-ին։ Մրցաշարի վերջին օրերին մեդալներ կխաղարկվեն ավելի ծանր քաշային կարգերում, այդ թվում՝ Հայաստանի ներկայացուցիչների մասնակցությամբ։