Գևորգ Դիարբյանը նորամուտ ունեցավ «Նյու Ինգլենդ Ռեվոլյուշն» հիմնական կազմում

23-ամյա վինգեր Գևորգ Դիարբյանը նորամուտ ունեցավ ԱՄՆ-ի Գավաթի (US Open Cup) շրջանակներում MLS-ի «Նյու Ինգլենդ Ռեվոլյուշն» ակումբի հիմնական կազմում։

1/16 եզրափակիչում «Ռոդ Այլենդի» դեմ խաղում Դիարբյանը դուրս եկավ դաշտ 87-րդ րոպեին և առանցքային դեր խաղաց հաղթական գոլի ընթացքում։ Նրա փոխանցումից հետո գնդակը դիպավ դարպասաձողին, այնուհետև թիմակիցը այն ուղարկեց դարպաս։ Արդյունքում «Նյու Ինգլենդ Ռեվոլյուշն»-ը հաղթեց 2:1 հաշվով և անցավ 1/8 եզրափակիչ, որտեղ կմրցի «Չիկագո Ֆայերի» հետ։

Դիարբյանը հանդես է գալիս ակումբի երկրորդ թիմում՝ MLS Next Pro առաջնությունում։ Այս մրցաշրջանում նա անցկացրել է 7 խաղ, խփել մեկ գոլ և կատարել մեկ գոլային փոխանցում։

Նշենք, որ ակումբի մեկ այլ հայ ֆուտբոլիստ՝ դարպասապահ Դոնովան Փարիզյանը, ընդգրկված էր հայտացուցակում, սակայն խաղադաշտ դուրս չեկավ։