Հունգարիայում խստացվել է լեգիոներների սահմանափակումը. ինչ ազդեցություն կունենա դա հայ ֆուտբոլիստների վրա

2025/26 մրցաշրջանից Հունգարիայի առաջնությունում ուժի մեջ է մտնում նոր և խիստ կանոն, որը սահմանափակում է լեգիոներների օգտագործումը։ Այժմ թիմերը պարտավոր են յուրաքանչյուր խաղում դաշտ դուրս բերել առնվազն հինգ հունգարացի ֆուտբոլիստ, որոնցից մեկը պետք է լինի մինչև 21 տարեկան։

Նոր կանոն՝ նվազագույնը հինգ հունգարացի և մեկ երիտասարդ խաղացող

Կանոնի խախտումը ֆորմալ հնարավոր է, սակայն այն դեպքում ակումբները կզրկվեն պետական ֆինանսավորումից և հարկային արտոնություններից։ Միևնույն ժամանակ Հունգարական ֆուտբոլային լիգան խոստանում է տարեկան 500 միլիոն ֆորինտ (մոտ $1.47 մլն) հատկացնել այն ակումբներին, որոնք խստորեն կհետևեն կանոնին։

Առաջիններից մեկը, որ արտահայտեց իր դիրքորոշումը, Պուշկաշ Ակադեմիան էր, որի կազմում խաղում է Հայաստանի ազգային հավաքականի պաշտպան Գեորգի Հարությունյանը։ Ակումբի ղեկավարությունը ողջունել է նորամուծությունները։ Վերջին ստուգողական խաղում «Պուշկաշը» խաղադաշտ է դուրս բերել 10 հունգարացի, իսկ միակ լեգիոները մեկնարկային կազմում հենց Հարությունյանն էր՝ ունենալով հայկական քաղաքացիություն։ Որպես մեկնարկային խաղացող ընդգրկվել է նաև ուկրաինացի Ալեքսանդր Ֆավորովը, սակայն նա ունի հունգարական անձնագիր և չի համարվում լեգիոներ։

«Պուշկաշի» ներկա կազմում կա 12 լեգիոներ, բայց նրանցից մի քանիսն արդեն ստացել են հունգարական քաղաքացիություն, իսկ ակումբն ունի բավարար երիտասարդ հունգարացի խաղացողներ, ինչը թույլ է տալիս հեշտությամբ բավարարել նոր պահանջները։ Սակայն Գեորգի Հարությունյանի համար իրավիճակը կարող է բարդանալ, քանի որ թիմում շատ են հունգարացի պաշտպանները։ Բայց Հայաստանի հավաքականի ֆուտբոլիստի բազմակողմանիությունն օգնում է նրան խաղալ նաև հենակետային գոտում կամ պաշտպանության ցանկացած դիրքում։ Հնարավոր է, որ որոշ խաղերում նա կմնա պահեստային, բայց իր խաղաժամանակը, ամենայն հավանականությամբ, կստանա, հատկապես եթե ակումբը հեռուն հասնի ՈւԵՖԱ Կոնֆերենցիայի լիգայում։

Բացարձակապես այլ իրավիճակում է հայտնվել Հայաստանի հավաքականի կիսապաշտպան Էդգար Սևիկյանը, ով հանդես է գալիս «Ֆերենցվարոշի» կազմում։ Ակումբն ունի 26 լեգիոներ, և նոր կանոններին հարմարվելն իրապես բարդ կլինի։ Ամենայն հավանականությամբ, «Ֆերենցվարոշի» ղեկավարությունը կփորձի հրաժարվել պետական աջակցությունից՝ պահելով մրցունակ կազմը և կենտրոնանալով եվրագավաթային խաղերի վրա, որոնք կարող են մեծ եկամուտ բերել։

Ուստի Սևիկյանը, ամենայն հավանականությամբ, անհանգստանալու կարիք չունի իր դերի համար ակումբում։ Գլխավորը՝ նոր գլխավոր մարզիչ Ռոբի Քինը թողնի նրան թիմում։ Հիշեցնենք, որ նախորդ մրցաշրջանը Սևիկյանն անցկացրել է վարձավճարով Մոսկվայի «Լոկոմոտիվում»։

Հետաքրքիր է, որ հուլիսի 9-ին երկու հայ լեգիոներն էլ մասնակցել են իրենց ակումբների ընկերական հանդիպումներին։ «Ֆերենցվարոշը» պատրաստվում է Չեմպիոնների լիգայի որակավորմանը, իսկ «Պուշկաշ Ակադեմիան»՝ Կոնֆերենցիայի լիգայի խաղերին։