Չեմպիոնների լիգա 2026-ի փլեյ-օֆֆի վիճակահանություն․ բոլոր զույգերը, խաղերի ամսաթվերը և «Ինտերի» բարդ արտագնա հանդիպումը
- Հեղինակ: Vahe Hakobyan
- Sportaran
Այսօր՝ հունվարի 30-ին, շվեյցարական Նիոնում որոշվեցին գլխավոր եվրագավաթի փլեյ-օֆֆի անցումային փուլի զույգերը։ Այս փուլը դարձել է մրցաշարի նոր ձևաչափի մաս․ լիգային փուլից հետո լավագույն ութ թիմերը ուղիղ դուրս են եկել 1/8 եզրափակիչ, իսկ 9-րդից 24-րդ տեղերը զբաղեցրած ակումբները միմյանց միջև կխաղարկեն ևս ութ ուղեգիր դեպի հաջորդ փուլ։
Վիճակահանության արդյունքում ձևավորվել են հետևյալ դիմակայությունները․
-
«Բորուսիա» Դորտմունդ — «Ատալանտա»
-
«Օլիմպիակոս» — «Բայեր» Լևերկուզեն
-
«Գալաթասարայ» — «Յուվենտուս»
-
«Բրյուգե» — «Ատլետիկո» Մադրիդ
-
«Մոնակո» — ՊՍԺ
-
«Ղարաբաղ» — «Նյուքասլ»
-
«Բենֆիկա» — «Ռեալ» Մադրիդ
-
«Բուդյո-Գլիմտ» — «Ինտեր»
Առանձնահատուկ ուշադրություն է գրավում միլանական «Ինտերի» մասնակցությամբ զույգը, որի կազմում հանդես է գալիս Հայաստանի հավաքականի նախկին ավագ Հենրիխ Մխիթարյանը։ «Ներաձուրիները» փլեյ-օֆֆը կսկսեն չափազանց բարդ արտագնա խաղով Նորվեգիայում՝ «Բուդյո-Գլիմտի» դեմ։ Վերջին տարիներին այս թիմը պարբերաբար խնդիրներ է ստեղծում եվրոպական գրանդների համար՝ իր արհեստական խոտածածկ դաշտում և բարդ կլիմայական պայմաններում։
Եթե «Ինտերը» երկու խաղերի արդյունքով կարողանա անցնել նորվեգական ակումբին, ապա 1/8 եզրափակիչում միլանցիներին սպասում է ևս մեկ թոփ-փորձություն՝ «Լիվերպուլի» կամ «Տոտենհեմի» դեմ։
Անցումային փլեյ-օֆֆի դիմակայությունները կանցկացվեն երկու խաղով։ Առաջին հանդիպումները կկայանան փետրվարի 17-ին և 18-ին, պատասխան խաղերը՝ 2026 թվականի փետրվարի 24-ին և 25-ին։ Կանոնակարգի համաձայն՝ յուրաքանչյուր թիմ մեկ խաղ կանցկացնի երեքշաբթի և մեկը՝ չորեքշաբթի, իսկ սերմավորված ակումբները, որպես կանոն, պատասխան հանդիպումները կխաղան տանը։
Քննարկեք նորությունները!
Անցնել մեկնաբանություններին ↓
Comments
3