Բուդապեշտի վարկանիշային ազատ ոճի ըմբշամարտի մրցաշարի վիճակահանությունն ու ուղիղ հեռարձակումը

Վաղը՝ հուլիսի 17-ին, Բուդապեշտում կմեկնարկի վարկանիշային ազատ ոճի ըմբշամարտի մրցաշարը՝ նվիրված լեգենդար հունգարացի ըմբիշներ Իմրե Պոլյակի և Յանոշ Վարգայի հիշատակին։ Մրցաշարը կհավաքի աշխարհի ուժեղագույն մարզիկներին, և առաջին օրը գորգ դուրս կգան Հայաստանի ազատ ոճի ըմբիշները՝ Արման Անդրեասյանը (70 կգ) և Վազգեն Թևանյանը (65 կգ)։

Տղամարդկանց բոլոր քաշային կարգերում՝ նախնական փուլերից մինչև եզրափակիչներ, բոլոր մենամարտերը կանցկացվեն հենց առաջին օրը։ Հուլիսի 18-ին կմեկնարկեն կանանց մենամարտերը, իսկ հուլիսի 19-ին՝ հունահռոմեական ոճի հանդիպումները։

Արդեն կայացել է ազատ ոճի ըմբշամարտի վիճակահանությունը, և հայտնի են բոլոր մենամարտերի զույգերը։

Ինչպես դիտել Բուդապեշտի Գրան-Պրին առցանց
• Պաշտոնական ուղիղ հեռարձակումը հասանելի է վճարովի բաժանորդագրությամբ՝ UWW+ հարթակում։

• Հայաստանում մրցաշարը հեռարձակելու է Fast Sports հեռուստաալիքը։

• Բացի այդ, անվճար դիտումը հասանելի կլինի SPORTARAN-ի Telegram ալիքով։

Վիճակահանության արդյունքներ (ազատ ոճ)

Վազգեն Թևանյան (65 կգ)
Թևանյանը մեկնարկելու է 1/8 եզրափակիչից՝ մրցելով փորձառու լեհ ըմբիշ Կշիշտոֆ Բենկովսկու հետ։ Հաղթանակի դեպքում նա կհանդիպի Միկյայ Նաիմի (Բուլղարիա) և Գամզատգաջի Խալիդովի (Հունգարիա) զույգի հաղթողի հետ։ Նույն հատվածում գտնվում է նաև Ալբանիան ներկայացնող ուժեղ ըմբիշ Իսլամ Դուդաևը, ում հետ հնարավոր է հանդիպում կիսաեզրափակիչում։

Արման Անդրեասյան (70 կգ)
Անդրեասյանը տեղ է զբաղեցրել ցածր հատվածում և կարող է հանդիպել հունգարացի Մուսուկաևի հետ, սակայն խուսափել է ճապոնացի Աոյագիի հետ բախումից։ Նրա առաջին մրցակիցը կլինի Ղազախստանից՝ Եգոր Անչուգինը, ով բարձր նվաճումներ չունի։ Երկրորդ փուլում հնարավոր է հանդիպում 19-ամյա իրանցի Սինա Խալիլիի հետ, իսկ կիսաեզրափակիչում՝ Մեքսիկայի ներկայացուցիչ Օստին Գոմեսի հետ, ով հանդես է եկել ԱՄՆ-ում։

Այս քաշային կարգի եզրափակիչը խոստանում է լինել լուրջ փորձություն. վերին հատվածում են ինչպես Ակակի Կեմերտելիձեն (Վրաստան), Քենան Հեյբատովը (Ադրբեջան), ճապոնացի Յոշինոսուկե Աոյագին, այնպես էլ ամերիկացի Բրենդան Քենոնը։

Հուլիսի 17-ի ժամանակացույցը (Երևանի ժամանակով)
12:30 — Նախնական մենամարտեր (Տղամարդիկ՝ 57, 61, 65, 70, 79, 97, 125 կգ)
15:30 — Կիսաեզրափակիչներ
16:30 — Մխիթարական մենամարտեր
19:00 — Եզրափակիչներ