«Նոա»-ի պաշտպան Գուտմունդուր Թորարինսոնը կշարունակի կարիերան Իսլանդիայում

Իսլանդական ÍA Ակրանես ֆուտբոլային ակումբը պաշտոնապես հայտարարել է 32-ամյա պաշտպան Գուտմունդուր Թորարինսոնի հետ պայմանագիր կնքելու մասին։ Կողմերի միջև համաձայնագիրը նախատեսված է երկու տարի ժամկետով, իսկ ֆուտբոլիստը նոր թիմին միացել է որպես ազատ գործակալ՝ Երևանի «Նոա»-ից հեռանալուց հետո։

Թորարինսոնը լքեց հայկական ակումբը, որի կազմում կարողացավ հասնել նշանակալի հաջողությունների՝ նվաճելով Հայաստանի առաջնության և Գավաթի տիտղոսները։ Նրա պրոֆեսիոնալ կարիերան ընդգրկում է ավելի քան 13 տարվա ելույթներ Իսլանդիայից դուրս․ պաշտպանն հանդես է եկել Նորվեգիայի, Շվեդիայի և Դանիայի առաջնություններում, ամերիկյան MLS-ում, ինչպես նաև Հունաստանի բարձրագույն լիգայում։

Տարբեր տարիներին իսլանդացի ֆուտբոլիստը «Ռոզենբորգ»-ի կազմում դարձել է Նորվեգիայի չեմպիոն և Գավաթակիր, «Նյու Յորք Սիթի»-ի հետ նվաճել է MLS-ի տիտղոսը, ինչպես նաև համալրել է իր տիտղոսների հավաքածուն «Նոա»-ի կազմում։

Միջազգային մակարդակում Գուտմունդուր Թորարինսոնը Իսլանդիայի ազգային հավաքականի կազմում անցկացրել է 15 հանդիպում։ ÍA-ում ընդգծում են, որ փորձառու պաշտպանի տեղափոխությունը կարևոր ուժեղացում է թիմի համար և ակնկալում են, որ նրա փորձն ու առաջնորդական հատկանիշները կօգնեն ակումբին առաջիկա մրցաշրջաններում։

«Նոա»-ի կազմում Թորարինսոնը մասնակցել է 44 հանդիպման՝ դառնալով 2 գոլի և 7 գոլային փոխանցման հեղինակ։