«Արարատի» երիտասարդ հոկեյիստները փայլուն հանդես եկան Նեշվիլում կայացած մրցաշարում

2025 թվականի հունիսի վերջին օրերին Թենեսի նահանգի Նեշվիլ քաղաքի սառցե արենայում անցկացվում էին հեղինակավոր Music City Cup մրցաշարի հերթական հանդիպումները։ Մասնակիցների շարքում առաջին անգամ պատմության մեջ հայտնվեց Ararat Hockey Club թիմը, որն իր մեջ միավորել էր ամբողջ Հյուսիսային Ամերիկայից հավաքված երիտասարդ հայ հոկեյիստներին, հայտնում է ArmenianWeekly-ը։

Հավաքականի ստեղծման գաղափարը պատկանում է Դալլասից Գրեգ Դեքիրմենջյանին, որը 2024 թվականի հոկտեմբերից սկսած մանրակրկիտ աշխատանք էր տանում՝ որոնելու տաղանդավոր 11–12 տարեկան խաղացողների։ ԱՄՆ-ի և Կանադայի տարբեր քաղաքներում գործող հայկական համայնքներին և եկեղեցիներին ուղղված զանգերի միջոցով նրան հաջողվեց կազմավորել երազանքների թիմ։ Գլխավոր մարզիչ նշանակվեց Լոս Անջելեսից Էնդի Գևորգյանը, որը ոչ միայն պատրաստում էր հոկեյիստներին, այլև մասնակցում էր նրանց ընտրությանը։

«Արարատի» առաջին մրցաշարը կայացավ հունիսի 27-29-ը Նեշվիլում։ Թիմի մեծամասնության համար սա առաջին համատեղ ելույթն էր, սակայն տղաները արագ գտան ընդհանուր լեզու և մարտական տրամադրվածությամբ դուրս եկան սառցե դաշտ՝ հետևելով իրենց նախնիների օրինակին՝ վճռականությամբ հաղթահարելու ցանկացած դժվարություն։

Նեշվիլ էին ժամանել Լոս Անջելեսից, Բոստոնից, Դալլասից, Կալգարիից և Տորոնտոյից հայ ընտանիքներ՝ իրենց երեխաներին աջակցելու համար։ Մրցաշարի մթնոլորտը վերածվեց իսկական տոնի․ հնչում էր հայկական երաժշտություն՝ լողավազանի մոտ, արենայում և հյուրանոցում, իսկ ընտանիքների միջև ստեղծվեցին ջերմ ընկերական կապեր, որոնք, ինչպես վստահ են մասնակիցները, կպահպանվեն երկար տարիներ։