Հայաստանի պատանեկան հունահռոմեական ըմբշամարտի հավաքականը 3-րդ տեղը զբաղեցրեց Ուֆայում անցկացված մրցաշարում

Մայիսի 22-ից 23-ը Ռուսաստանի Ուֆա քաղաքում կայացավ մինչև 16 տարեկան պատանիների թիմային մրցաշարը՝ նվիրված ԽՍՀՄ վաստակավոր մարզիչ Վլադիմիր Բորմանի հիշատակին:

Մրցաշարին մասնակցեցին Հայաստանի, Բելառուսի, Մոսկվայի, Մոսկվայի մարզի, Սիբիրյան դաշնային շրջանի, Չելյաբինսկի մարզի, Տատարստանի և Բաշկորտոստանի հավաքականները։

Մրցումները անցկացվեցին 10x10 հանդիպումների ձևաչափով։

Խմբային փուլում Հայաստանի հավաքականը տարավ երկու հաղթանակ՝ Մոսկվայի (8:2) և Սիբիրյան դաշնային շրջանի (9:1) նկատմամբ, սակայն պարտվեց Մոսկվայի մարզին՝ 4:6։ Կիսաեզրափակչում հայկական թիմը ևս մեկ պարտություն կրեց՝ այս անգամ Բաշկորտոստանից՝ նույն հաշվով՝ 4:6։ Երրորդ տեղի համար հանդիպմանը Հայաստանը վստահ հաղթանակ տարավ Բելառուսի նկատմամբ՝ 8:2 և արժանացավ բրոնզե մեդալների։

Առաջին տեղը գրավեց Մոսկվայի մարզի թիմը, որը եզրափակչում 7:3 հաշվով հաղթեց Բաշկորտոստանին։

Հայաստանի հավաքականի կազմում հանդես եկան հետևյալ ըմբիշները՝

• 38 կգ՝ Վարդան Մելքոնյան

• 41 կգ՝ Վաագն Գրիգորյան

• 44 կգ՝ Վարդան Սահակյան

• 48 կգ՝ Նարեկ Այլյան

• 52 կգ՝ Գեղամ Եղիազարյան, Արայիկ Հեմչյան

• 62 կգ՝ Պավել Նազարյան

• 68 կգ՝ Արամ Սարգսյան

• 75 կգ՝ Ժորա Սարգսյան

• 85 կգ՝ Գոռ Խաչատրյան

• 100 կգ՝ Ալբերտ Կիրակոսյան

Բացի այդ, Մոսկվայի մարզի կազմում հանդես է եկել նաև Արտեմ Մանվելյանը (75 կգ):