«Փյունիկ» ակադեմիայի սաները երկու անգամ հաղթեցին իռլանդական թիմին

Իռլանդական Cabinteely FC (U14) ակումբի երիտասարդական թիմը Երեւան էր ժամանել Իռլանդիայի ազգային հավաքականի հետ միասին՝ «Փյունիկ» ակադեմիայի հասակակիցների հետ ընկերական հանդիպումների շարք անցկացնելու, ինչպես նաեւ աջակցելու իրենց հավաքականին՝ Աշխարհի 2026 թվականի առաջնության ընտրական խաղում Հայաստանի դեմ։

Ակադեմիաների հանդիպումները կայացան սեպտեմբերի 8-ին եւ 9-ին «Փյունիկի» մարզադաշտերում։ Երկու խաղերում էլ տոնեց հաղթանակ տանտերը․

• 2011 թվականին ծնված «Փյունիկի» թիմը մրցակցին ջախջախեց 12:0 հաշվով,

• 2012 թվականին ծնված թիմը հաղթեց իռլանդացիներին՝ 3:1 հաշվով։

Ընկերական շարքից հետո Cabinteely FC-ի երիտասարդ ֆուտբոլիստները սեպտեմբերի 9-ի երեկոյան այցելեցին Հանրապետության մարզադաշտ՝ աջակցելու Իռլանդիայի հավաքականին Հայաստանի դեմ խաղում։ Սակայն նրանց ուրախությունը խամրեց, երբ հայկական թիմը ԱԱ-2026-ի որակավորման F խմբի երկրորդ տուրում հաղթեց 2:1 հաշվով։

Հիշեցնենք՝ դեռեւս Երեւան մեկնելուց առաջ իռլանդական ակումբը այս ուղեւորությունը համարել էր «կյանքի ճանապարհորդություն» երիտասարդ մարզիկների համար։ Հայաստան էին ժամանել ոչ միայն 14 ֆուտբոլիստները, այլեւ թիմի մարզչական շտաբը։