Վարազդատ Հարոյան. «Ես ավարտեցի Հայաստանի հավաքականում կարիերաս միայն մարզչի պատճառով»

Հայաստանի հավաքականի նախկին ավագ Վարազդատ Հարոյանը Championat.com կայքին տված հարցազրույցում պատմել է ազգային թիմից հեռանալու պատճառների մասին, ինչպես նաև իր կարծիքը հայտնել հայ ֆուտբոլիստների ապագայի վերաբերյալ։

Հարոյանը նշել է, որ իր որոշումը կապված է հավաքականի գլխավոր մարզիչ նշանակված Եղիշե Մելիքյանի հետ․

«Ինձ արդեն 33 տարեկան է, և ես այնքան երիտասարդ չեմ, որ ինչ-որ բաներ հանդուրժեմ։ Շատ շնորհակալ եմ Հայաստանի հավաքականին՝ այն ինձ շատ բան է տվել։ Բայց ես չեմ ուզում աշխատել այս մարզչի հետ, որովհետև գիտեմ՝ ոչինչ չի ստացվի, և անգամ փորձել ցանկություն չունեմ։ Ես ավարտեցի հավաքականում կարիերաս բացառապես այս պատճառով»։

Ֆուտբոլիստը շեշտել է, որ հազիվ թե վերադառնա թիմ նույնիսկ մարզչի փոփոխության դեպքում, թեև 15 տարվա ընթացքում երբեք բաց չի թողել հավաքականները և միշտ հավատարիմ է մնացել ազգային թիմին։

Հարոյանի կարծիքով՝ Հայաստանի հավաքականի նոր ավագը պետք է դառնա Էդուարդ Սպերցյանը․

«Էդիկը արժանի է ավագի թևկապին։ Նա պետք է հեռանա ՌՊԼ-ից և փորձի իրեն Եվրոպայում։ Համոզված եմ, որ նա մեծ աստղ կդառնա»։

Տիգրան Բարսեղյանը՝ Հայաստանի հավաքականի նոր ավագ։

Հարոյանը նաև խոսել է մյուս ֆուտբոլիստների մասին․

Նաիր Տիկնիզյանի «Ցրվենա Զվեզդա» տեղափոխությունը նա ճիշտ քայլ է համարել։

Ինչ վերաբերում է «Ֆերենցվարոշում» հանդես եկող Էդգար Սևիկյանին, Հարոյանը նշել է, որ նրան պետք է վարձավճարով թիմ փոխել՝ ավելի շատ խաղային պրակտիկա ստանալու համար։

Ուգոչուկվու Իվուի վերաբերյալ նա ընդգծել է, որ նա օգնում է հավաքականին և արժանի է հարգանքի։

Ազգային թիմի շանսերի մասին խոսելիս՝ Հարոյանը հույս է հայտնել, որ Հայաստանը կարող է դուրս գալ 2026 թվականի աշխարհի առաջնություն՝ ընդգծելով միասնության կարևորությունը․

«Ես երազում եմ, որ իմ երկիրը խաղա մեծ մրցաշարում։ Մենք պետք է բոլորս միասին հավաքվենք և լուծենք հարցերը, ինչպես դա արեց Վրաստանը»։

Վարազդատ Հարոյանը Հայաստանի հավաքականում անցկացրել է 15 տարի, եղել է թիմի ավագը և խփել է 4 գոլ՝ դաշտ դուրս գալով 92 անգամ։ Ներկայումս հայ ֆուտբոլիստը հանդես է գալիս Հունգարիայի առաջնությունում՝ «Կազինբարսիկ» թիմի կազմում։

Այսօր՝ սեպտեմբերի 9-ին, Հայաստանի հավաքականը կխաղա Իռլանդիայի դեմ՝ ԱԱ-2026-ի ընտրական փուլում։