Վագներ Գոնսալվեշը հեռացավ «Փյունիկից»

Բրազիլացի վինգեր Վագներ Գոնսալվեշը հեռացավ Երևանի «Փյունիկ» ֆուտբոլային ակումբից։ 29-ամյա ֆուտբոլիստը հայկական ակումբին միացել էր 2023 թվականի ամռանը՝ Թբիլիսիի «Դինամոյից» տեղափոխվելուց հետո։

Գոնսալվեշի նորամուտը «Փյունիկի» կազմում տեղի ունեցավ ՈՒԵՖԱ-ի Կոնֆերենցիաների լիգայի որակավորման առաջին փուլում՝ Էստոնիայի «Նարվա Տրանս» թիմի դեմ խաղում (2:0)։ Արդեն իր առաջին մրցաշրջանում բրազիլացին կարողացավ ամրապնդվել հիմնական կազմում և կարևոր ներդրում ունեցավ 2023/24 մրցաշրջանում Հայաստանի չեմպիոնի տիտղոսի նվաճման գործում։

«Փյունիկի» կազմում անցկացրած ժամանակահատվածում Գոնսալվեշը մասնակցել է 58 հանդիպման, խփել է 8 գոլ և կատարել 9 գոլային փոխանցում։

2024 թվականի ամռանը՝ նախամրցաշրջանային ուսումնամարզական հավաքի ընթացքում, Վագները ստացել է ծանր վնասվածք, որի պատճառով երկար ժամանակ դուրս էր մնացել խաղադաշտից։ Նա կարողացավ վերադառնալ խաղադաշտ միայն ընթացիկ տարվա փետրվարին։

Նշենք, որ Վագներ Գոնսալվեշը դարձավ այս ձմռանը «Փյունիկը» լքած երրորդ ֆուտբոլիստը․ ավելի վաղ ակումբը բաժանվել էր Սերոբ Գալցյանից և Դանիիլ Պոլյանսկուց։

Նաև սպասվում է, որ այս ձմռանը «Փյունիկի» կազմ կվերադառնա վինգեր Վյաչեսլավ Աֆյանը, որը պարտադիր զինվորական ծառայության ընթացքում երկու տարի հանդես էր գալիս ԲԿՄԱ-ի կազմում։ Այդ ընթացքում Աֆյանը դարձել է ակումբի և Հայաստանի երիտասարդական հավաքականի առանցքային խաղացողներից մեկը։