Գյումրիում կայացավ Հայաստանի և Չեխիայի հոկեյի հավաքականների հանդիպումը

Փետրվարի 21-ին Գյումրիում կայացավ արդեն ավանդական դարձած ընկերական տափօղակով հոկեյի հանդիպումը Հայաստանի հավաքականի և Չեխիայի սիրողական հավաքականի միջև։ Հանդիպումը տեղի ունեցավ Բարեկամության զբոսայգում և կազմակերպվել էր Հայաստանում Չեխիայի դեսպանության աջակցությամբ։

Խաղն ավարտվեց հայկական թիմի արդյունավետ հաղթանակով՝ 11:8 հաշվով։ Հայաստանի հավաքականը ձևավորվել էր այն խաղացողներից, որոնք պատրաստվում են ներկայացնել երկիրը IV դիվիզիոնի աշխարհի առաջնությունում, որը կանցկացվի Քուվեյթում 2026 թվականի ապրիլին։ Այսպիսով, Գյումրիում կայացած հանդիպումը դարձավ ազգային հավաքականի միջազգային մրցաշարին նախապատրաստման կարևոր փուլ։

Հատկանշական է, որ այն ժամանակ, երբ Չեխիայի հիմնական հավաքականը մասնակցում էր Օլիմպիական խաղերին, Հայաստանում ևս «կրակոտ» մթնոլորտ էր․ Բարեկամության զբոսայգու սահադաշտում ծավալվեց վառ և հուզիչ պայքար, որը հանդիսատեսին պարգևեց իսկական մարզական տոն։

Միջոցառումը դարձավ բարի ավանդույթի շարունակություն․ նմանատիպ հայ-չեխական հոկեյային երեկո Գյումրիում անցկացվել էր նաև մեկ տարի առաջ։ Այս տարի խաղի մասնակիցների թվում էր Հայաստանում Չեխիայի Հանրապետության արտակարգ և լիազոր դեսպան Պետր Պիրունչիկը, ով ոչ միայն ներկա էր խաղին, այլև դուրս եկավ սահադաշտ։

«Չեխիան ունի հզոր հոկեյի հավաքական և հարուստ ավանդույթներ․ սա մեր երկրում ամենահայտնի մարզաձևն է։ Սակայն Հայաստանում ևս կա հրաշալի տղամարդկանց տափօղակով հոկեյի թիմ։ Խորհրդային տարիներին Գյումրին ուներ իր հոկեյի թիմը, և այսօր անհրաժեշտ է կրկին մասսայականացնել այս մարզաձևը երիտասարդության շրջանում։ Այս խաղով ցանկանում ենք վերականգնել այդ ավանդույթը։ Արդեն երկրորդ անգամ եմ մասնակցում Գյումրիում անցկացվող ընկերական հանդիպմանը։ Մթնոլորտը հրաշալի է», — նշեց դեսպանը՝ ընդգծելով, որ հանդիպման գլխավոր նպատակը ոչ թե հաղթանակն էր, այլ սպորտի խթանումն ու բարեկամության ամրապնդումը։

Միջոցառման մասնակիցներին ողջունեց Շիրակի մարզպետ Դավիթ Առուշանյանը։ Նա նշեց, որ Գյումրին կարող է ներդաշնակորեն համատեղել մարզական և մշակութային միջոցառումները։

«Մեզ համար մեծ ուրախություն է հյուրընկալել այս միջոցառումը։ Նման հանդիպումները հիանալի հնարավորություն են համատեղելու սպորտն ու բարեկամությունը։ Սպորտը վաղուց դարձել է ժողովուրդներին միավորող, փոխադարձ հարգանք և վստահություն ձևավորող ուժ։ Հայաստանի և Չեխիայի ժողովուրդների միջև հարաբերությունները տարիների ընթացքում ամրապնդվել են փոխադարձ աջակցության և արդյունավետ համագործակցության շնորհիվ։ Այսօր մենք ևս մեկ անգամ հաստատում ենք, որ այդ կապերը շարունակում են զարգանալ», — ընդգծեց մարզի ղեկավարը։

Երեկոն հագեցած էր ոչ միայն մարզական, այլև մշակութային ծրագրով։ Խաղից առաջ ելույթ ունեցավ «Հրայրք» ավանդական պարի համույթը՝ ներկայացնելով ազգային պարեր և անցկացնելով վարպետության դաս հյուրերի համար։ Տոնական տրամադրությունն ապահովեցին նաև «Կումայրի» մանկապատանեկան փողային նվագախմբի սաները։

Գյումրիում հոկեյային երեկոն վերածվեց ադրենալինով, վառ զգացմունքներով և բարձր տրամադրությամբ լի իրական տոնի, որն ուղեկցվեց չեխական ուտեստների հյուրասիրությամբ։ Միջոցառումը ևս մեկ անգամ հաստատեց, որ սպորտը մնում է ժողովուրդների միջև բարեկամության և համագործակցության հզոր կամուրջ։