Գյումրիում տեղի ունեցավ Հայաստանի և Չեխիայի հավաքականների միջև բարեկամական հոկեյի հանդիպում

Մարտի 8-ին Գյումրի քաղաքում՝ Բարեկամության զբոսայգում, բաց երկնքի տակ անցկացվեց բարեկամական հոկեյի հանդիպում Հայաստանի և Չեխիայի հավաքականների միջև։

Չեխիայի հավաքականի կազմում հանդես եկան սիրողական և վետերան խաղացողներ, իսկ Հայաստանի հավաքականը ներկայացված էր խաղացողներով, ովքեր պատրաստվում են Աշխարհի առաջնությանը՝ IV դիվիզիոնում, որը կանցկացվի Հայաստանում։

Հանդիպումն ավարտվեց Հայաստանի հավաքականի հաղթանակով՝ 6:3 հաշվով։ Շեյբեր հեղինակեցին Սերգեյ Խուդյակովը, Իվան Ինյակովը (երեք անգամ), Պավել Եղիազարյանը և Արսեն Համբարձումյանը։

Չեխիայի դեսպան Պետր Պիլունչիկն էլ մասնակցեց խաղին։ Հանդիպումից հետո նա նշեց Գյումրիում տիրող բարեկամական մթնոլորտը և հավելեց, որ իր թիմակիցները Հայաստան էին ժամանել ընդամենը խաղից մեկ օր առաջ և հոգնած էին, բայց, անկախ դրանից, մեծ հաճույք ստացան։

Պիլունչիկը նաև հույս հայտնեց, որ նման հանդիպում կկայանա նաև հաջորդ տարի, և կատակով նշեց, որ իր թիմը կփորձի խաղալ հավասար՝ 6:6 հաշվով։ Վերջում նա հաջողություն մաղթեց Հայաստանի հավաքականին առաջիկա Աշխարհի առաջնությունում, որը կանցկացվի ապրիլին Երևանում։

Հանդիպման բոլոր գոլերը կարելի է դիտել AHL-ի Telegram-ալիքում։

Սառցե հոկեյի աշխարհի առաջնությունը IV դիվիզիոնում կանցկացվի Երևանում՝ 2025 թվականի ապրիլի 13-ից 19-ը։