Հունաստանում հորինել են սեփական «Չեմպիոնների լիգան»

2025/26 մրցաշրջանից Հունաստանի ֆուտբոլի Գավաթը՝ Greek Cup Betsson, առաջին անգամ կանցկացվի նոր ձևաչափով։ Կազմակերպիչները որոշել են ամբողջությամբ վերակառուցել մրցաշարը՝ հիմք ընդունելով եվրոպական ակումբային մրցաշարերի՝ Չեմպիոնների լիգայի, Եվրոպայի լիգայի և Կոնֆերենցիաների լիգայի համակարգը։

Այժմ ազգային գավաթը կներառի որակավորման փուլ, լիգայի փուլ և փլեյ-օֆֆ։

Ինչպես է դա գործելու
Լիգայի փուլում կմասնակցի 20 ակումբ․

• 8 թիմ՝ Հունաստանի Սուպերլիգայից (ըստ 2024/25 մրցաշրջանի արդյունքների),

• 11 թիմ՝ որակավորման փուլի հաղթողներ,

• 1 թիմ՝ ուղղակի ուղեգրով։

Յուրաքանչյուր ակումբ կանցկացնի 4 խաղ (2 տնային, 2 արտագնա), իսկ մրցակիցները որոշվելու են վիճակահանությամբ։ Բոլոր թիմերը կհայտնվեն ընդհանուր մրցաշարային աղյուսակում։

1-4-րդ տեղերը զբաղեցրած թիմերը անմիջապես կանցնեն քառորդ եզրափակիչ։
5-12-րդ տեղերը զբաղեցրածները կխաղան փլեյ-օֆֆ՝ մնացած ուղեգրերի համար։

Հունաստանի գավաթի հաղթողը իրավունք կստանա մասնակցել 2026/27 մրցաշրջանի Եվրոպայի լիգայի 3-րդ որակավորման փուլին, ինչպես նաև Սուպերգավաթին։ Եթե տիտղոսը նվաճի երկրի չեմպիոնը, ապա Սուպերգավաթում նրա մրցակիցը կլինի գավաթի եզրափակիչի մասնակիցը։

Եվրոպական օրինակներ
Եվրոպայի շատ երկրներում գավաթները դեռ մնում են դասական՝ փլեյ-օֆֆի ձևաչափով։ Սակայն փորձերը խմբային և լիգայի փուլերով գնալով ավելանում են։

• Թուրքիա․ 2025/26-ից Թուրքիայի գավաթն էլ է փոխում ձևաչափը։ Կլինեն 3 խումբ՝ յուրաքանչյուրը 8 թիմով։ Յուրաքանչյուր ակումբ կանցկացնի 4 խաղ տարբեր մրցակիցների հետ։ Քառորդ եզրափակիչ կանցնեն յուրաքանչյուր խմբի 2 լավագույն թիմերը և 2 լավագույն երրորդ տեղերը։

• Շվեդիա և Ռուսաստան․ այս երկրներում ազգային գավաթներում վաղուց կա խմբային փուլ։ Ռուսաստանում նաև գործում է «մարզերի ուղին»՝ ցածր լիգաների համար։

• Շոտլանդիա․ 2025/26-ից Challenge Cup-ում (երկրորդ և երրորդ լիգաների, ինչպես նաև դուբլերի համար նախատեսված մրցաշար) նույնպես ներդրվել է լիգայի փուլ։ 30 թիմ կանցկացնի 6 խաղ, որից հետո լավագույնները կշարունակեն փլեյ-օֆֆում։

Նոր միտո՞ւմ
Ազգային գավաթներում լիգայի փուլերի ներդրումը նոր գաղափար է եվրոպական ֆուտբոլում։ Հունական ձևաչափը հատկապես հետաքրքիր է․ այն միավորում է թե՛ դասական գավաթը, թե՛ փոքր առաջնությունը մեկ մրցաշարում։ Այժմ տիտղոսի համար պայքարը կլինի ոչ միայն մեկ խաղով, այլև ամբողջական ճանապարհով՝ ավելացնելով ինտրիգ և դիտարժանություն։

Առաջին անգամ այսպիսի ձևաչափը UEFA-ն ներդրեց 2024/25 մրցաշրջանից երեք եվրոպական մրցաշարերում։ Լիգայի փուլը աչքի ընկավ բարձր դիտարժանությամբ ու ինտրիգով։ Փորձը հաջողվեց, և այժմ այն կարող է տարածվել նաև ազգային գավաթներում։