Երևանում մեկնարկել է հետհաշվարկը 2025 թվականի կարատեի Եվրոպայի առաջնությանն ընդառաջ

Երևանի կենտրոնում՝ Հյուսիսային պողոտայում, երկուշաբթի օրը խորհրդանշական մեկնարկ տրվեց մեծահասակների կարատեի 60-րդ, հոբելյանական Եվրոպայի առաջնության մեկնարկի հետհաշվարկին։ Մինչ մրցաշարի մեկնարկը մնում է ավելի քան երկու շաբաթ։

Միջոցառմանը մասնակցում էին ՀՀ կրթության, գիտության, մշակույթի և սպորտի նախարարի տեղակալ Ասմիկ Ավագյանը և Հայաստանի կարատեի ազգային ֆեդերացիայի նախագահ Վազգեն Հարությունյանը։

«Հայաստանի համար սա մեծ պատիվ է։ Նման նշանակալի մարզական իրադարձության անցկացումը կարևոր քայլ է՝ երկրի միջազգային սպորտային իմիջի ամրապնդման ճանապարհին», — նշել է Ավագյանը։ Նա ընդգծել է, որ արևելյան մարտարվեստներն անչափ սիրված են հայկական երիտասարդության շրջանում, իսկ նման մրցաշարերը խթանում են կարատեի հետագա զարգացումը հանրապետությունում։

Ֆեդերացիայի նախագահ Վազգեն Հարությունյանն ասել է, որ նախապատրաստական աշխատանքները ընթանում են ըստ պլանի, և մեծ մասն արդեն ավարտված է։ Նա նաև հիշեցրել է, որ այս մակարդակի մրցաշարի անցկացումը ոչ միայն ճանաչում է, այլև կարևոր փորձառություն՝ 2027 թվականին Հայաստանում կայանալիք մինչև 21 տարեկանների Եվրոպայի առաջնությունից առաջ։ Նրա խոսքով՝ ակնկալվում է, որ երիտասարդական մրցաշարը ավելի մասշտաբային կլինի թե՛ մասնակիցների թվով, թե՛ կազմակերպչական չափանիշներով։

Մեծահասակների Եվրոպայի առաջնությունը կանցկացվի Երևանում՝ մայիսի 7-ից 11-ը։ Սպասվում է ավելի քան հազար մարզիկների և պաշտոնյաների մասնակցություն՝ ավելի քան 50 երկրից։ Տոնական բացումը նախատեսված է մայիսի 8-ին, իսկ գլխավոր եզրափակիչ մենամարտերը տեղի կունենան մայիսի 10-ին և 11-ին։