Երևանում կկառուցվի սպորտ-մշակութային համալիր Համահայկական խաղերի համար

Հայաստանի կառավարությունը հաստատել է «Ջրվեժի» անտառապարկի տարածքում բազմաֆունկցիոնալ սպորտ-մշակութային կենտրոն կառուցելու նախագիծը։ Որոշումը ընդունվել է Համահայկական խաղերի անցկացման նախապատրաստական աշխատանքների շրջանակում։

Նախաձեռնության իրագործման նպատակով Համահայկական կոմիտեին տրամադրվել է 23.3 հա հողատարածք՝ 50 տարի ժամկետով շինարարության իրավունքով։ Ներդրումային ծրագրի ընդհանուր արժեքը կազմում է 20.9 միլիարդ դրամ, իսկ իրագործման ժամկետը նախատեսված է 13 տարի։

Նոր համալիրը կդառնա խաղերի մասնակիցների հիմնական կենտրոնը՝ ինչպես ամառային, այնպես էլ ձմեռային։ Մնացած ժամանակ այն կօգտագործվի երիտասարդական ճամբարների, մշակութային և կրթական ծրագրերի, Հայաստան–Սփյուռք միջոցառումների, ինչպես նաև հանգստի ու ժամանցի կազմակերպման համար։

Առաջին փուլում նախատեսվում է էկո-տնակների, ճաշարանի և բժշկական կենտրոնի տեղադրում։ Կառույցները կտեղադրվեն ծառերից ազատ հատվածներում և չեն ենթադրի կապիտալ շինարարություն։ Հաջորդ փուլերում ծրագիրը ներառելու է մարզադահլիճների և մարզասրահների կառուցում։

Ծրագրի շրջանակում նախատեսվում է տնկել շուրջ 20 հազար ծառ և ստեղծել ավելի քան 1200 նոր աշխատատեղ։

Համալիրը սպասարկելու և պահպանելու ծախսերը ստանձնելու է Համահայկական կոմիտեն։