«Առյուծի Սիրտ» ակումբի գլխավոր մարզադահլիճը կբացվի Երևանում

Երևանը պատրաստվում է դառնալ մարտարվեստների աշխարհի նոր կենտրոնը․ Հայաստանի մայրաքաղաքում կբացվի «Առյուծի Սիրտ» մենամարտային ակումբի գլխավոր դահլիճը։ Այս մասին հայտարարվեց Եգոր Գլումովի փոդքասթի ժամանակ, որի հյուրերն էին Արման Ծառուկյանը, Էդուարդ Վարդանյանը և գլխավոր մարզիչ Արմեն Գուլյանը։

«Մենք կհավաքենք լավագույն մարզիկներին, պարապմունքները անվճար կլինեն։ Հինգ տարի հետո ամեն ինչ կփոխվի, և Հայաստանը կդառնա ոչ միայն տարածաշրջանի, այլև աշխարհի մենամարտային կենտրոնը», – ասաց Արմեն Գուլյանը։

Նոր դահլիճի բացումը նախատեսված է 2025 թվականի հուլիսի վերջում կամ օգոստոսի սկզբին։ Սա պարզապես մարզասրահ չէ, այլ իրական մարտարվեստի ակադեմիա՝ անվճար ուսուցմամբ։ Արդեն ընտրված է համապատասխան շինություն, որտեղ այժմ ընթանում են ավարտական աշխատանքներ։ Նոր դահլիճի ըմբշամարտի գոտին միայն մեծությամբ կգերազանցի Մոսկվայի «Առյուծի Սիրտ» դահլիճի ամբողջ մակերեսը։

MMA-ի գլխավոր մարզիչ Արմեն Գուլյանը պլանավորում է տեղափոխվել Հայաստան և զարգացնել MMA-ի ոլորտը տեղում։ Մոսկվայում մարզվող հայ մարզիկները ևս ցանկանում են վերադառնալ Երևան և շարունակել մարզումները հենց այստեղ։ Դահլիճում կհավաքվեն լավագույն հայ մարզիկները և փորձառու մարզիչները։ Ակնկալվում է նաև ֆինանսական աջակցություն՝ խոստումնալից մարզիկների համար։

Նախագծի հիմնական գաղափարը՝ ստեղծել Հայաստանում այնպիսի պայմաններ, որ մարզիկները ստիպված չլինեն մեկնել արտերկիր որակյալ մարզումների համար։ Դահլիճը տեխնիկապես չի զիջի աշխարհի առաջատար մարզահամալիրներին։ Այստեղ կմարզվեն հայկական մարտարվեստի աստղերը, որոնց կողքին երեխաները կսովորեն և կշնչեն նույն մթնոլորտով։

Դահլիճի բացումից հետո նախատեսվում է անցկացնել մեծածավալ մարզական հավաքներ, որտեղ կմասնակցեն բազմաթիվ պրոֆեսիոնալ մարզիկներ։ Սա կլինի առաջին քայլը Հայաստանի՝ համաշխարհային MMA կենտրոն դառնալու ճանապարհին։