Սարսափելի խաղ և օրինաչափ արդյունք․ Հայաստանի Մ21-ը պարտվեց Հյուսիսային Մակեդոնիային

Հայաստանի մինչև 21 տարեկանների հավաքականը հերթական պարտությունն է կրել՝ սեփական հարկի տակ 0:2 հաշվով զիջելով Հյուսիսային Մակեդոնիայի Մ21 հավաքականին ԵՎՐՈ-2027-ի ընտրական փուլի 8-րդ տուրի շրջանակում։

Այս պարտությունը դարձավ արդեն 11-րդը անընդմեջ պաշտոնական խաղերում՝ մտահոգիչ շարք, որը ընդգծում է թիմի ճգնաժամի խորությունը։

Եթե նախորդ հանդիպումներում Հայաստանի հավաքականը ցուցադրում էր արժանի խաղ, հավասար պայքար մղում մրցակիցների հետ և հաճախ չէր արժանի պարտության (այդ թվում՝ Չեռնոգորիայի և Իտալիայի դեմ խաղերում), ապա այս անգամ դրական պահեր գրեթե չկային։ Թիմը թույլ տեսք ուներ հարձակման գծում և չկարողացավ իրական վտանգ ստեղծել մրցակցի դարպասին։

Հիշեցնենք, որ Հյուսիսային Մակեդոնիայի դեմ առաջին խաղում հայկական հավաքականը պարտվել էր անարդարացիորեն, ինչպես նաև Չեռնոգորիայի դեմ խաղում, իսկ Իտալիայի դեմ ցուցադրել էր իր լավագույն հանդիպումներից մեկը։ Սակայն այս անգամ թիմը չկարողացավ հաստատել նույնիսկ այդ մակարդակը։

Արմեն Գյուլբուդաղյանցի սաները հաջորդ հանդիպումը կանցկացնեն հոկտեմբերի 1-ին Երևանում՝ Իտալիայի Մ21 հավաքականի դեմ։

Առանձին նշենք Հայաստանի ազգային հավաքականի երկու ֆուտբոլիստների մասնակցությունը՝ Նարեկ Հովհաննիսյան և Արթուր Ասկարյան, որոնք ընդամենը երկու օր առաջ մասնակցել էին Բելառուսի դեմ խաղին։

Հայաստանի Մ21 հավաքականի կազմը․
Գոռ Մատինյան — Մհեր Թարլոյան, Պետիկ Մանուկյան, Մարկ Ավետիսյան, Պողոս Կրմզյան — Էդգար Փիլոյան (46, Արթուր Ասկարյան), Դավիթ Հակոբյան (77, Էդիկ Վարդանյան), Համլետ Սարգսյան (65, Դավիթ Կիրակոսյան) — Վյաչեսլավ Աֆյան (46, Նարեկ Հովհաննիսյան), Միսակ Հակոբյան (78, Դավիթ Հարությունյան), Արայիկ Էլոյան։

8 տուրից հետո Հայաստանի Մ21 հավաքականը դեռևս չի վաստակել ոչ մի միավոր։ Հյուսիսային Մակեդոնիան ունի 6 միավոր, որոնք բոլորը նվաճվել են Հայաստանի դեմ խաղերում։