ՈՒԵՖԱ-ն ներկայացրել է ֆուտզալի խաղադաշտերի յուրահատուկ դիզայնը ԵՎՐՈ-2026-ի համար

ՈՒԵՖԱ-ն պաշտոնապես ներկայացրել է ֆուտզալի Եվրոպայի 2026 թվականի առաջնության եզրափակիչ փուլի խաղադաշտերի դիզայնը։ Մրցաշարը կանցկացվի հունվարի 21-ից փետրվարի 7-ը Լիտվայում, Լատվիայում և Սլովենիայում։

Ինչպես հայտնում է ՈՒԵՖԱ-ի պաշտոնական կայքը, խաղադաշտերի գունային լուծումները արտացոլում են երեք հյուրընկալող երկրների ազգային ինքնությունը և ընդգծում կազմակերպության ձգտումը՝ ամրապնդելու ֆուտզալի տեսողական ոճը և բարձրացնելու մրցաշարի դիտարժանությունը։

Յուրաքանչյուր հյուրընկալող երկիր ստացել է դաշտի պերիմետրի սեփական, յուրահատուկ ոճավորված դիզայնը․

• Ռիգայում այն իրականացված է ավանդական լատվիական կարմիր գույնով,

• Կաունասում օգտագործվել է Լիտվայի դրոշի վերին դեղին շերտի գույնը,

• Լյուբլյանայում՝ բաց կանաչ երանգ, որը խորհրդանշում է Սլովենիայի անտառներն ու բնությունը։

Հայաստանի հավաքականը խմբային փուլի հանդիպումները կանցկացնի հենց Կաունասում, որտեղ խաղադաշտը ձևավորված է Լիտվայի դրոշի գույներով։ Հայաստանը B խմբում կմրցի Ուկրաինայի, Չեխիայի և Լիտվայի հավաքականների հետ։

ՈՒԵՖԱ-ն հիշեցրել է, որ ֆուտզալի խաղադաշտերի արտաքին տեսքը առաջին անգամ կտրուկ փոփոխել է դեռևս 2010 թվականին՝ Հունգարիայում կայացած Եվրոպայի առաջնությունում ներկայացնելով սև խաղային ծածկույթ, որը հետագայում դարձել է ֆուտզալի Չեմպիոնների լիգայի եզրափակիչների այցեքարտը։ Այդ ժամանակից ի վեր հավաքականների մրցաշարերում կիրառվում է ստանդարտ մուգ կապույտ՝ 40×20 մետր չափերով խաղադաշտ, որը լրացվում է հյուրընկալող երկրի առանձնահատկություններին համապատասխան գրաֆիկայով։

ԵՎՐՈ-2026-ի հետաքրքիր նորամուծություններից մեկն էլ կլինի այն, որ առաջին անգամ խաղադաշտի պերիմետրի վրա կտեղադրվի մրցաշարի գործընկեր Qatar Airways-ի լոգոտիպը։

ՈՒԵՖԱ-ում ընդգծում են, որ խաղադաշտերի անհատական դիզայնը, որը հաջողությամբ կիրառվել է նախորդ մրցաշարերում (նեոնային կանաչ՝ Սլովենիայում 2018 թվականին և վառ նարնջագույն՝ Նիդերլանդներում 2022-ին), ֆուտզալի զարգացման երկարաժամկետ ռազմավարության մաս է կազմում և նպաստում է մրցաշարերի վառ ու ճանաչելի կերպարի ստեղծմանը՝ ինչպես մարզադահլիճներում, այնպես էլ ամբողջ աշխարհում հեռուստադիտողների համար։