Վահան Բիչախչյանի «Լեգիան» մրցաշրջանի ընթացքում երկրորդ անգամ փոխեց գլխավոր մարզչին

Վարշավայի «Լեգիան» պաշտոնապես հայտարարեց նոր գլխավոր մարզչի նշանակման մասին։ Դեկտեմբերի 19-ից ակումբի առաջին թիմը գլխավորել է Մարեկ Պապշունը, ով պայմանագիր է ստորագրել մինչև 2027/28 մրցաշրջանի ավարտը։ Մոտ ժամանակներս մասնագետը կձևավորի իր մարզչական շտաբը, որից հետո թիմը կսկսի պատրաստվել մրցաշրջանի երկրորդ հատվածին։

Պապշունի գլխավորությամբ առաջին մարզումները նախատեսված են հունվարի 5-ին։ Հունվարի 10-ին «Լեգիան» կմեկնի ձմեռային հավաքի Իսպանիայի Անդալուսիա՝ Միխաս քաղաք, որտեղ թիմը կպատրաստվի Լեհաստանի առաջնության գարնանային հատվածին։

Զուգահեռաբար ակումբում տեղի են ունենում կարևոր կառավարչական փոփոխություններ։ Հունվարի 1-ից վարչությունից կհեռանա փոխնախագահ Յարոսլավ Յուրչակը, ով 12 տարի պատասխանատու էր ֆինանսական, իրավական և վարչական ոլորտների համար։ Նա կշարունակի աշխատանքը ակումբի սեփականատերերի կառույցներում։ Այսպիսով, 2026 թվականի սկզբից «Լեգիայի» վարչությունը կդառնա երկհոգանոց, իսկ օպերացիոն կառավարման ամբողջ պատասխանատվությունը կստանձնի Մարցին Հերրան։

«Լեգիայի» սեփականատեր Դարիուշ Միոդուսկին ընդգծել է, որ Մարեկ Պապշունի նշանակումը երկար և բարդ գործընթացի արդյունք է, որը արտացոլում է վստահությունը մարզչի փորձի և պրոֆեսիոնալիզմի նկատմամբ։ Նա նաև վստահություն է հայտնել, որ Պապշուն–Հերրա տանդեմը կօգնի ակումբին իրացնել իր մարզական և բիզնես ներուժը։

Իր հերթին Մարցին Հերրան նշել է, որ այս պահին գլխավոր խնդիրը թիմին որակապես պատրաստելն է մրցաշրջանի գարնանային հատվածին և բարդ մարզական իրավիճակից դուրս գալը։

Հիշեցնենք, որ «Լեգիայի» կազմում հանդես է գալիս Հայաստանի ազգային հավաքականի կիսապաշտպան Վահան Բիչախչյանը։ Ընթացիկ մրցաշրջանում նա մասնակցել է բոլոր մրցաշարերին՝ խփելով 4 գոլ և կատարելով 2 գոլային փոխանցում։

Լեհաստանի առաջնության 18 տուրից հետո վարշավյան ակումբը գտնվում է լուրջ ճգնաժամի մեջ․ «Լեգիան» զբաղեցնում է 17-րդ տեղը և գտնվում է դուրս մնալու գոտում։ Կոնֆերենցիաների լիգայում թիմը նույնպես անհաջող է հանդես եկել՝ զբաղեցնելով 28-րդ տեղը և չհաղթահարելով փլեյ-օֆֆի փուլը։

Սա արդեն երկրորդ մարզչական փոփոխությունն է «Լեգիայում» այս մրցաշրջանում։ Հոկտեմբերին թիմը լքել էր Էդվարդ Յորդանեսկուն, ում փոխարինեց Ինյակի Աստիսը, սակայն նա աշխատեց ընդամենը մեկուկես ամիս։

Նոր գլխավոր մարզիչ Մարեկ Պապշունը նախկինում աշխատել է «Ռակուվում» և 2023 թվականին դարձել է Լեհաստանի չեմպիոն։