«Ուրարտուն» 33 տարվա մեջ առաջին անգամ կունենա տիտղոսային հովանավոր
- Հեղինակ: Vahe Hakobyan
- Sportaran
«Ուրարտու» ֆուտբոլային ակումբը և Յունիբանկը բարձրանում են նոր մակարդակի․ հունիսի 27-ից Յունիբանկը պաշտոնապես դառնում է երևանյան թիմի տիտղոսային հովանավորը։ Համագործակցության ստորագրման արարողությունը տեղի կունենա ակումբի մարզաբազայում և կարևոր փուլ կլինի թե՛ «Ուրարտուի», թե՛ հայկական ֆուտբոլի համար։
Ակումբի պատմության մեջ սա առաջին անգամ է, երբ «Ուրարտուն» ունենում է տիտղոսային հովանավոր։
Ըստ ձեռք բերված պայմանավորվածության՝ համագործակցությունը միտված է ակումբի ենթակառուցվածքների զարգացմանը, երիտասարդական ակադեմիայի աջակցմանը և սոցիալական ծրագրերի իրագործմանը։ «Ուրարտուի» նախագահ Ջևան Չելոյանցը կարևորել է այս գործարքի ռազմավարական նշանակությունը․
«Յունիբանքի հետ համագործակցությունը կարևոր քայլ է ակումբի կայուն զարգացման և նոր բարձունքների հասնելու ճանապարհին։ Ուրախ ենք աշխատել գործընկերոջ հետ, ով կիսում է մեր արժեքներն ու նպատակները»։
Յունիբանկի Վարչության նախագահ Մեսրոպ Հակոբյանը իր հերթին նշել է, որ բանկը «Ուրարտուի» հետ համագործակցությունը դիտարկում է որպես ներդրում հայկական ֆուտբոլի ապագայի մեջ․
«Ուրախ ենք տիտղոսային հովանավորը դառնալ այնպիսի թիմի, որը ունի վառ ինքնություն և հավակնոտ նպատակներ։ Վստահ ենք, որ այս համագործակցությունը ամուր հիմք կդնի նոր հաղթանակների և ձեռքբերումների համար թե՛ թիմի, թե՛ երկրպագուների համար։ Յունիբանկը շարունակելու է աջակցել հայկական սպորտին և առողջ ապրելակերպի արժեքների տարածմանը»։
«Ուրարտուն» Հայաստանի ամենատիտղոսակիր ակումբներից մեկն է՝ երկակի չեմպիոն և Հայաստանի Գավաթի քառակի հաղթող։ 2022/23 մրցաշրջանում թիմը գրանցեց պատմական «ոսկե դաբլ»։ Այսօր «Ուրարտուն» կայուն մասնակցություն է ցուցաբերում ներքին առաջնություններում և ներկայացնում է Հայաստանը միջազգային ասպարեզում՝ պատրաստելով նոր սերնդի ֆուտբոլիստներ։
Համագործակցությունը Յունիբանքի հետ խորհրդանշական մեկնարկ կունենա հուլիսի 10-ին՝ ՈւԵՖԱ-ի Կոնֆերենցիաների լիգայի առաջին խաղում՝ բելառուսական «Նեմանի» դեմ։ Այդ օրը «Ուրարտուն» առաջին անգամ հանդես կգա նոր տիտղոսային հովանավորի լոգոտիպով մարզաշապիկով։ Սա կլինի ակումբի պատմության նոր փուլի սկիզբ՝ աճի, հավակնությունների և հաղթանակների փուլ։
Քննարկեք նորությունները!
Անցնել մեկնաբանություններին ↓
Comments
0