Երեք բրոնզ՝ մարտական սամբոյում. Եվրոպայի առաջնության առաջին օրվա արդյունքները հայ մարզիկների համար

Լիմասոլում մեկնարկել է սամբոյի Եվրոպայի 2025 թվականի առաջնությունը։ Մրցումների առաջին օրը հայ մարզիկները մարտական սամբոյի բաժնում նվաճեցին երեք բրոնզե մեդալ։

Բոլոր երեք պարգևները նվաճվեցին տղամարդկանց բաժնում․

Համլետ Սուքիասյանը (մինչև 58 կգ քաշային կարգ) մեկնարկեց հաղթանակով Ուկրաինայի ներկայացուցչի նկատմամբ, սակայն կիսաեզրափակչում պարտվեց ռուս մարզիկին և դարձավ բրոնզե մեդալակիր։

Մհեր Մերժանյանը (մինչև 71 կգ) առաջին մենամարտում հաղթեց իսպանացուն, բայց հաջորդ փուլում պարտվեց վրացի մարզիկին ու ևս բրոնզե մեդալ նվաճեց։

Ավետիք Պողոսյանը (մինչև 88 կգ) նախ հաղթեց Նիդերլանդների ներկայացուցչին, սակայն կիսաեզրափակչում պարտվեց վրացի սամբիստին և զբաղեցրեց երրորդ տեղը։

Ծանր քաշային կարգում (+98 կգ) Նորիկ Խուրշուդյանը պարտվեց ուկրաինացի մարզիկին առաջին ռաունդում և մնաց առանց մեդալի։

Սպորտային սամբոյի բաժնում հայ մարզիկները մեդալ չնվաճեցին․

Մաքսիմ Մանուկյանը (մինչև 64 կգ) իսպանացու նկատմամբ հաղթանակից հետո կիսաեզրափակչում պարտվեց վրացուն, իսկ բրոնզի համար մենամարտում պարտվեց բուլղարացի մրցակցին։

Բորիս Շատվերյանը (մինչև 79 կգ) 1/8 եզրափակչում պարտվեց ռուս մարզիկին, ապա մխիթարական փուլում հաղթեց խորվաթին, սակայն բրոնզե մեդալի համար պայքարում կրկին պարտվեց բուլղարացուն։

Արսեն Խանջյանը (մինչև 98 կգ) սկսեց հաղթանակով Բոսնիայի և Հերցեգովինայի մարզիկի նկատմամբ, բայց քառորդ եզրափակչում պարտվեց բելառուս մրցակցին։

Կանանց մոտ ևս չհաջողվեց մեդալ նվաճել․

Արպինե Ամիրյանը (մինչև 50 կգ) քառորդ եզրափակչում պարտվեց ուկրաինուհուն, ապա բրոնզե մեդալի համար մենամարտում զիջեց բելառուսուհուն։

Անի Մնացականյանը (մինչև 59 կգ) նույնպես ավարտեց մրցաշարը երկու պարտությամբ՝ քառորդ եզրափակչում իսպանուհուց և բրոնզի համար մենամարտում ռումինուհուց։

Մրցումները շարունակվելու են առաջիկա օրերին, և Հայաստանի հավաքականը դեռ ունի մեդալային հաշվարկը հարստացնելու հնարավորություն։

Հայաստանի հավաքականի ամբողջական կազմը կարող եք դիտել ԱՅՍՏԵՂ։