Երեք հայ լեգեոներներ անցկացրին Չեմպիոնների լիգայի երրորդ փուլի պատասխան հանդիպումները

Երեքշաբթի՝ օգոստոսի 12-ին, կայացան 2025/26 մրցաշրջանի ՈւԵՖԱ-ի Չեմպիոնների լիգայի որակավորման երրորդ փուլի պատասխան հանդիպումները։ Այդ օրը դաշտ դուրս եկան ակումբներ, որոնց կազմում հանդես են գալիս Հայաստանի ազգային հավաքականի ֆուտբոլիստներ Նաիր Տիկնիզյանը, Տիգրան Բարսեղյանը և Էդգար Սևիկյանը։

Բրատիսլավայի «Սլովանը» դրամատիկ կերպով ավարտեց պայքարը Չեմպիոնների լիգայում՝ հետխաղյա 11-մետրանոցների սերիայում զիջելով Ղազախստանի «Կայրաթին»։ Տիգրան Բարսեղյանը խաղում էր բոլոր 120 րոպեներին և իր թիմի ամենաակտիվ խաղացողներից էր՝ ստեղծելով ազատ գոտիներ և հարվածային պահեր իր գործընկերների համար։ Սակայն հենց նա չկարողացավ իրացնել վճռորոշ 11-մետրանոցը, ինչը մեծ ուրախություն պարգևեց ղազախական երկրպագուներին, որոնք ջերմությամբ են հիշում նրա ելույթները տեղի ակումբներում։ Այժմ «Սլովանը» կշարունակի մրցաշրջանը Եվրոպայի լիգայում, որտեղ կհանդիպի շվեյցարական «Յանգ Բոյզին», իսկ «Կայրաթը» կպայքարի ՉԼ-ի խմբային փուլի համար՝ մրցելով շոտլանդական «Սելթիկի» հետ։ Հետաքրքիր է, որ նախորդ մրցաշրջանում հենց Բարսեղյանի գոլն էր, որը «Սլովանին» դուրս բերեց Չեմպիոնների լիգա, իսկ այս անգամ նրա վրիպումը թիմին ուղարկեց Եվրոպայի լիգա։

Սերբական «Ցրվենա Զվեզդան» ընդհանուր 4:2 հաշվով առավելության հասավ լեհական «Լեխի» նկատմամբ և դուրս եկավ Չեմպիոնների լիգայի փլեյ-օֆֆ։ Հաջորդ փուլում Սերբիայի չեմպիոնը կմրցի Կիպրոսի «Պաֆոսի» հետ, որը հաղթահարեց Կիևի «Դինամոյին»։ Բելգրադում հանդիպումներից առաջ չէին թաքցնում, որ ցանկանում էին խուսափել ուկրաինական թիմի հետ մրցելուց՝ և դա հաջողվեց։ Նաիր Տիկնիզյանը «Լեխի» հետ պատասխան խաղում մասնակցեց ամբողջ 90 րոպեն։

Հունգարական «Ֆերենցվարոշը» վստահ հաղթանակ տարավ բուլղարական «Լուդոգորեցի» նկատմամբ (3:0), որի գլխավոր մարզիչն է «Նոայի» նախկին ղեկավարը՝ Ռուի Մոտան։ Համեմատած հայ ակումբի դեմ խաղերի հետ՝ հունգարացիները ցույց տվեցին ավելի բարձր որակի ֆուտբոլ։ Հայաստանի հավաքականի հարձակվող Էդգար Սևիկյանը չմասնակցեց երրորդ փուլի հանդիպումներին և, ամենայն հավանականությամբ, չի հայտավորվի նաև փլեյ-օֆֆում Ադրբեջանի «Ղարաբաղի» դեմ, քանի որ չի կարող մեկնել Բաքու, և մեկ տնային հանդիպման համար Ռոբբի Քինը հազիվ թե նրան ընդգրկի հայտացուցակում։

Չեմպիոնների լիգայի փլեյ-օֆֆի խաղերը կանցկացվեն օգոստոսի 19-ին և 20-ին, իսկ Եվրոպայի լիգայի փլեյ-օֆֆը՝ օգոստոսի 21-ին։

Օգոստոսի 12-ին որոշված փլեյ-օֆֆ զույգերը՝