Երեք հայ ըմբիշներ՝ մինչև 17 տարեկանների Եվրոպայի առաջնության կիսաեզրափակչում

Հունիսի 9-ից Սկոպյեում (Հյուսիսային Մակեդոնիա) մեկնարկել է հունահռոմեական ըմբշամարտի մինչև 17 տարեկանների Եվրոպայի առաջնությունը։ Մրցաշարի առաջին օրը նախնական գոտեմարտեր են անցկացվել հինգ քաշային կարգերում՝ 48 կգ, 55 կգ, 65 կգ, 80 կգ և 110 կգ:

Հայաստանի հավաքականը կիսաեզրափակիչ է դուրս եկել երեք քաշային կարգերում։

48 կգ քաշային կարգում Մարտին Մանջիկյանը կամային հաղթանակ է տարել Հունաստանը ներկայացնող ըմբիշի նկատմամբ՝ 8:8 հաշվով և դուրս եկել կիսաեզրափակիչ, որտեղ մրցելու է ադրբեջանցի Գուրբան Մաջնունովի հետ։

55 կգ քաշային կարգում Վազգեն Մնացականյանը վստահ հաղթանակներ է տարել՝ 9:0 տեխնիկական հաղթանակներ Սերբիայի և Իսրայելի ըմբիշների նկատմամբ, իսկ Ուկրաինայի ներկայացուցիչին հաղթել է 2:1 հաշվով՝ ապահովելով տեղը կիսաեզրափակչում։ Այնտեղ նրա մրցակիցը կլինի վրացի Գեորգի Չաչուան։

65 կգ քաշային կարգում Ջանես Նազարյանը կիսաեզրափակիչ է դուրս եկել՝ 8:0 հաշվով հաղթելով մոլդովացուն և 4:0՝ ռուս ըմբիշին։ Եզրափակիչի ուղեգրի համար նա կպայքարի շվեդ Ալվին Տուլինդերի դեմ։

80 կգ քաշային կարգում Վահե Հովեյանը իր ելույթը ավարտել է 1/8 եզրափակիչում՝ պարտվելով հայ արմատներով ռուս ըմբիշ Սենիկ Վարդանյանին։ Վարդանյանը շարունակում է պայքարը և կիսաեզրափակչում մրցելու է Թուրքիայի ներկայացուցչի հետ։

110 կգ քաշային կարգում Գոռ Մխիթարյանը չի կարողացել հաղթահարել քառորդ եզրափակչի փուլը՝ պարտվելով բուլղար ըմբիշին։