«Նոայի» մարզիչը խաղից հետո․ «Շնորհավորում եմ ակումբին Չեմպիոնների լիգայում պատմական հաղթանակի կապակցությամբ»

Ֆուտբոլային ակումբ «Նոայի» գլխավոր մարզիչ Սանդրո Պերկովիչը մեկնաբանեց իր թիմի հաղթանակը Չեմպիոնների լիգայի 2025/26-ի որակավորման առաջին փուլում՝ «Բուդուչնոստի» նկատմամբ: Հուլիսի 8-ին Աբովյանում կայացած հանդիպումն ավարտվեց 1:0 «Նոայի» օգտին։ Սա «Նոայի» պատմության մեջ առաջին հանդիպումն էր Չեմպիոնների լիգայում։

Սանդրո Պերկովիչի մամուլի ասուլիսը խաղից հետո
— Շնորհավորում եմ իմ ֆուտբոլիստներին և ամբողջ ակումբին այս պատմական հաղթանակի առթիվ։ Մրցակիցը խիտ պաշտպանություն էր կազմակերպել և կարծես նպատակ չուներ հարձակվելու։ Դժվար էր նման պաշտպանություն հաղթահարել, բայց մենք գտանք պահը և խփեցինք հաղթական գոլը։
Շնորհակալ եմ երկրպագուներին աջակցության համար։ Շատ կարևոր էր սկսել հաղթանակով։

Պոդգորիցայում խաղը բոլորովին այլ կլինի։ Ով ավելի լավ պատրաստվի, նա էլ կհաղթի ու կանցնի առաջ։

Հաղթական գոլի հեղինակ Ուլադ Օմարի փոփոխության մասին
— Միշտ լավ է, երբ փոփոխությամբ դուրս եկող ֆուտբոլիստը գոլ է խփում կամ փոխում խաղի ընթացքը՝ այդ ժամանակ մարզչին են գովում։ Հակառակ դեպքում՝ քննադատում։ Դա նորմալ է։ Մեր թիմում շատ լավ խաղացողներ կան, բոլորին միաժամանակ խաղացնել հնարավոր չէ։ Որոշեցի սկսել Մանվելյանից և երկրորդ կեսում խաղադաշտ դուրս բերել Իմրանին՝ խաղն ուժեղացնելու համար։ Ուլադ Օմարը դուրս եկավ և դարձավ հերոս՝ խփելով հաղթական գոլը ու լավացնելով հարձակումը։
Բայց ուզում եմ նշել բոլոր խաղացողներին — նրանք հիանալի աշխատանք կատարեցին։

Ամեն օր մենք ավելի լավ կխաղանք։

Պատրաստվելը երկրորդ հանդիպմանը
— Դեռ վաղ է խոսել պատասխան խաղի մասին։ Նախ պետք է հանգստանանք և հանգիստ վերլուծենք ամեն ինչ։ Մինչ հաջորդ հանդիպումը դեռ մեկ շաբաթ կա, և հիմնական կազմը կորոշենք վերջին մարզումից հետո։

Այո, սա իմ առաջին պաշտոնական հանդիպումն էր որպես գլխավոր մարզիչ։ Մինչ այդ անցկացրել էինք չորս ընկերական խաղ։ Գոհ եմ խաղացողների կայունությունից։ Բայց կրկնեմ՝ շատ դժվար է խաղալ այն թիմի դեմ, որը երկշերտ պաշտպանություն է կառուցում։ Բացի մեկ-երկու կիսավտանգավոր պահերից՝ մրցակիցը գրեթե ոչինչ չունեցավ։ Մենք կարող էինք ավելի շատ գոլ խփել, բայց ընդհանուր առմամբ գոհ եմ արդյունքից։

Հարձակման աշխատանքն ու Իմրանի գոլը
— Համաձայն եմ՝ պետք է ավելի շատ հարվածներ կատարեինք։ Հավաքարանում այդ մասին խոսեցինք։ Իմրանը լսեց ինձ և երկրորդ կեսում փորձում էր ամեն հնարավորությունից հարվածել։ Ի վերջո, նրա հեռվից հարվածը դարձավ հաղթական։
Մեզ դեռ շատ վերլուծություն և աշխատանք է սպասվում։ Հույս ունեմ, հաջորդ խաղերում ավելի հաճախ կսպառնանք մրցակցի դարպասին։

Դարպասապահների և Յան Էտեկիի մասին
— Օգնեն Չանչարևիչը այս պահին մեր հիմնական դարպասապահն է։ Բայց մենք ունենք ևս երեք ուժեղ ու երիտասարդ դարպասապահներ։ Ամբողջ մրցաշրջանի ընթացքում բոլորն էլ կստանան իրենց հնարավորությունը։

Շատ գոհ եմ նաև Յան Էտեկիի խաղից։ Նա մեր հենակետային կիսապաշտպանն է, բայց միաժամանակ լավ սկսում էր հարձակումները ու տեմպ հաղորդում։ Շնորհիվ նրա ճիշտ գործողությունների՝ «Բուդուչնոստը» չկարողացավ լուրջ պահեր ստեղծել։

Ցուցակի և Տորարինսոնի բացակայության մասին
— Պատասխան խաղի հայտացուցակը չի կարող փոփոխվել, բայց հաջորդ փուլերում փոփոխություններ կանենք։
Ինչ վերաբերում է Գյուդմունդուր Տորարինսոնին՝ նա թեթև վնասվածք ուներ։ Այսօր չէր կարող խաղալ, ուստի որոշեցինք չներառել նրան առաջին փուլի հայտացուցակում։