Հայկական ծագում ունեցող մարզիչ Արմինե Բարությանին ժամանակավորապես հեռացրել են աշխատանքից ԱՄՆ-ում

ԱՄՆ SafeSport կենտրոնը կարգապահական պատժամիջոցներ է կիրառել ամերիկյան հայտնի մարզիչների՝ Ալ Ֆոնգի և Արմինե Բարությանի նկատմամբ։ Կազմակերպության տվյալների բազայի համաձայն՝ Ֆոնգն ու Բարությանը մեղավոր են ճանաչվել մարզիկների նկատմամբ ֆիզիկական և հուզական ոչ պատշաճ վարք դրսևորելու համար։

Ալ Ֆոնգը հեռացվել է մարզչական գործունեությունից մինչև 2030 թվականի դեկտեմբերի 22-ը, իսկ նրա կինը՝ Արմինե Բարությանը, ստացել է մեկ տարվա որակազրկում։ Երկու մարզիչներն էլ հանդիսանում են Միսսուրի նահանգում գործող Great American Gymnastics Express (GAGE) կենտրոնի հիմնադիրներն ու ղեկավարները։ Այն ԱՄՆ-ի ամենահայտնի մարմնամարզական դպրոցներից մեկն է, որը պատրաստել է օլիմպիական և աշխարհի մրցանակակիր մարզիկներ։

GAGE-ի ղեկավարությունը արդեն հայտարարել է, որ համաձայն չէ SafeSport-ի եզրակացությունների հետ և պատրաստվում է բողոքարկել որոշումը արբիտրաժում։ Պաշտոնական հայտարարության մեջ նշվում է, որ եզրակացությունները կայացվել են առանց ականատեսների ցուցմունքների և չեն արտացոլում ամբողջական պատկերը։

Արմինե Բարությանը ԽՍՀՄ հավաքականի նախկին մարմնամարզուհի է, ծնունդով՝ Հայաստանից։ 1980-ականների սկզբին նա համարվում էր իր սերնդի ամենախոստումնալից մարզիկներից մեկը։ Բարությանը հաղթել է միջազգային մրցաշարերում, այդ թվում՝ Արևելյան բլոկի երկրների պատանեկան առաջնություններում, «Բարեկամության գավաթում» և Իսպանիայում անցկացված Moncada Cup-ում։ 1983 թվականին ԽՍՀՄ առաջնությունում նա կատարել է իր ժամանակի ամենաբարդ տարրերից մի քանիսը, ներառյալ կրկնակի սալտո խմբավորմամբ և եռակի սալտո բրուսների վրա։

Իր խոսքերով՝ Բարությանի մարզական կարիերան բարդացել է քաղաքական գործոնների պատճառով․ Մոսկվային մոտ տեղափոխվելու և ազգանունը փոխելուց հրաժարվելը հանգեցրել է համակարգի հետ կոնֆլիկտի, ինչից հետո նա հեռացվել է հավաքականից։ Կարիերան ավարտելով 1988 թվականին՝ նա արտագաղթել է ԱՄՆ, որտեղ սկսել է մարզչական գործունեություն և ավելի քան 20 տարի աշխատել GAGE-ում։ Վերջին տարիներին Բարությանը նաև ընդգրկված է եղել ԱՄՆ հավաքականի մարզչական շտաբում՝ պատանեկան միջազգային մրցումներին։