Տիգրան Բարսեղյանը ներողություն է խնդրել Իռլանդիայի դեմ խաղում ստացած կարմիր քարտի համար․ «Զիջեցի հույզերիս և սխալվեցի»

Հայաստանի ազգային հավաքականի ավագ Տիգրան Բարսեղյանը առաջին անգամ մեկնաբանել է այն դրվագը, որի պատճառով կարմիր քարտ է ստացել 2026 թվականի աշխարհի առաջնության ընտրական փուլի Իռլանդիայի դեմ առանցքային խաղում, որը կայացել էր հոկտեմբերի 14-ին։ Հիշեցնենք՝ Հայաստանի հավաքականը պարտվեց 0:1 հաշվով, իսկ ավագի հեռացումը զգալի ազդեցություն ունեցավ հանդիպման ելքի վրա։

Բարսեղյանը հեռացվել էր ոչ սպորտային վարքի համար՝ իռլանդացի կիսապաշտպան Ֆինն Ազազին գլխով հարվածելու պատճառով։ ՖԻՖԱ-ի կարգապահական կոմիտեն հետագայում նրան որակազրկեց երեք խաղով։

Ֆուտբոլիստը հայտարարությամբ է հանդես եկել՝ արտահայտելով իր զղջումը.

«Կյանքում, հատկապես ֆուտբոլում, լինում են պահեր, երբ շատ դժվար է մի վայրկյանի ընթացքում ճիշտ որոշում ընդունել։ Ցավոք, վերջին խաղում ես զիջեցի հույզերիս և սխալվեցի», — խոստովանել է Բարսեղյանը։

«Շատ եմ զղջում, որ առաջիկա կարևոր հանդիպումներում չեմ կարողանա մասնակցել և օգնել թիմին։ Հայաստանի հավաքականը միշտ պայքարում է մինչև վերջ, և վստահ եմ, որ իմ թիմակիցները ամեն ինչ կանեն հաղթանակի համար՝ իրենց ուժերի առավելագույնը ներդնելով», — հավելել է ավագը։

Բարսեղյանը նաև շնորհակալություն է հայտնել մարզչական շտաբին, խաղընկերներին և երկրպագուներին աջակցության համար.

«Շնորհակալ եմ գլխավոր մարզիչ Եղիշե Մելիքյանին, իմ թիմակիցներին և Հայաստանի հավաքականի բոլոր երկրպագուներին վստահության և ջերմության համար, որը զգում եմ նույնիսկ այս բարդ պահին։ Դա ինձ մեծ ուժ է տալիս։ Այսօր հատկապես գնահատում եմ մեր թիմի միասնությունը․ ստեղծվել է առողջ և ընկերական մթնոլորտ, որտեղ դժվարությունները հաղթահարելն ավելի հեշտ է։ Ես միշտ թիմի կողքին եմ՝ նույնիսկ եթե ժամանակավորապես դաշտից դուրս եմ»։