ՀՖԿՍՊԻ-ի ուսանողները՝ Եվրոպայի չեմպիոններ շախմատում

Երևանում ավարտվեց 2025 թվականի Եվրոպայի համալսարանների շախմատի առաջնությունը, որտեղ փայլուն արդյունք գրանցեցին Հայաստանի Ֆիզիկական կուլտուրայի և սպորտի պետական ինստիտուտի ուսանողները։ Նրանք նվաճեցին ոսկե մեդալներ ինչպես տղաների, այնպես էլ աղջիկների մրցաշարերում՝ դառնալով մրցումների գլխավոր հաղթողները։

Տղաների հավաքականը գրանցեց «երկակի ոսկի», քանի որ հաղթեց ոչ միայն հիմնական առաջնությունում, այլև կայծակնային շախմատի մրցումներում։ Թիմում հանդես եկան Շանթ Սարգսյանը և Մամիկոն Ղարիբյանը։ Աղջիկների թիմը, որի կազմում էին Մարիամ Ավետիսյանը և Մարիամ Խաչատրյանը, նույնպես գրավեց առաջին տեղը։ Թիմի մարզիչն էր ինստիտուտի դոցենտ Երվանդ Հակոբյանը։

Այս տարի առաջնությանը մասնակցեցին 17 երկրների 32 համալսարանների 40 թիմեր։ Հայաստան ժամանեց շուրջ 120 պատվիրակ։ Մրցաշարը կազմակերպվել էր Եվրոպական համալսարանական սպորտի ասոցիացիայի (EUSA), Հայաստանի ուսանողական մարզական ֆեդերացիայի և Հայաստանի պետական տնտեսագիտական համալսարանի նախաձեռնությամբ՝ Հայաստանի շախմատի ակադեմիայի մասնագիտական աջակցությամբ։

ՀՖԿՍՊԻ-ի ուսանողների հաղթանակը ևս մեկ անգամ ընդգծեց Հայաստանի առաջատար դիրքերը շախմատային Եվրոպայում։