Սպերցյանը հանվել է «Տարվա ջենթլմեն» մրցանակի թեկնածուների ցուցակից սկանդալի պատճառով

«Ֆուտբոլային տարվա ջենթլմեն» ամենամյա մրցանակի կազմակերպիչ հանձնաժողովը հայտարարել է «Կրասնոդարի» կիսապաշտպան Էդուարդ Սպերցյանին մրցանակի հավակնորդների ցուցակից հանելու մասին։ Որոշումն ընդունվել է բարձրաձայն սկանդալի ֆոնին՝ կապված ՌՊԼ-ի խաղում ֆուտբոլիստի կողմից ռասիստական արտահայտությունների օգտագործման մեղադրանքների հետ։

Ինչպես հայտնում է «Կոմսոմոլսկայա պրավդան», մրցանակի ներկայացուցիչները նշել են, որ «ստեղծված իրավիճակում՝ ՌՖՍ կարգապահական կոմիտեի՝ խաղացողին տուգանելու որոշումից հետո և հանրային լայն արձագանքը հաշվի առնելով, Սպերցյանի մասնակցությունը մրցույթին հակասում է մրցանակի ոգուն»։

Կոնֆլիկտը Սպերցյանի և Նդոնգի միջև պաշտոնապես հարթվել է՝ համաձայն ԿԴԿ-ի հայտարարության։

Սկանդալը բռնկվեց «Կրասնոդար»–«Ախմատ» հանդիպման ժամանակ տեղի ունեցած միջադեպից հետո, երբ Գրոզնիի թիմի պաշտպան Ուսման Նդոնգը դուրս գրվեց խաղից՝ Սպերցյանին հարվածելու համար։ Ավելի ուշ «Ախմատի» ֆուտբոլիստը հայտարարեց, որ իր մրցակիցը նրան սադրել է ռասիստական արտահայտություններով։ ՌՖՍ Կարգապահական կոմիտեն, ուսումնասիրելով դրվագը, երկու խաղով (մեկը՝ պայմանական) որակազրկեց Նդոնգին և տուգանեց Սպերցյանին 150 հազար ռուբլով՝ մրցակցին վիրավորելու համար։

Հայ ֆուտբոլիստին «Տարվա ջենթլմեն» կոչման թեկնածուների ցուցակից հանելուց հետո եզրափակիչ եռյակում մնացել են «Կրասնոդարի» դարպասապահ Ստանիսլավ Ագկացևը, Մախաչկալայի «Դինամոյի» հարձակվող Համիդ Ագալարովը և «Զենիթի» կիսապաշտպան Անդրեյ Մոստովոյը, ով ավելի վաղ տուգանվել էր էթիկայի կոմիտեի կողմից՝ «Սպարտակի» հասցեին անպարկեշտ վանկարկման համար։

Այսպիսով, «Զենիթի» ֆուտբոլիստ Անդրեյ Մոստովոյը, որը ամռանը տուգանվել էր ՌՖՍ-ի էթիկայի կոմիտեի կողմից 75 հազար ռուբլով՝ «Սպարտակի» վերաբերյալ վիրավորական երգի համար, կարող է ճանաչվել «Տարվա ջենթլմեն», իսկ արդարացված Սպերցյանը՝ ոչ։

«Տարվա ջենթլմեն» մրցանակը հիմնադրվել է «Կոմսոմոլսկայա պրավդա» թերթի կողմից 1994 թվականին և կրում է մոսկովյան «Սպարտակի» լեգենդար կիսապաշտպան Ֆյոդոր Չերենկովի անունը։ Այն ավանդաբար շնորհվում է այն ֆուտբոլիստին, ով դրսևորել է ազնվություն, հարգանք մրցակիցների նկատմամբ և բարձր սպորտային մշակույթ։

Կազմկոմիտեն ափսոսանք է հայտնել տեղի ունեցածի կապակցությամբ և ընդգծել է, որ «Սպերցյանի բացառումը չի կասկածի տակ դնում նրա պրոֆեսիոնալ որակները և տաղանդը, սակայն մրցանակը պահանջում է համապատասխանություն բարձր բարոյական չափանիշներին, որոնք ձևավորվել են իր պատմության տասնամյակների ընթացքում»։