Եվրագավաթներում հայկական ակումբների մրցակիցները խաղեր անցկացրել են իրենց առաջնություններում՝ մինչև վճռական հանդիպումները

Մինչև ՈւԵՖԱ Չեմպիոնների լիգայի և ՈւԵՖԱ Գավաթների լիգայի որակավորման երկրորդ փուլի պատասխան հանդիպումները հայկական ակումբների մրցակիցները հերթական խաղերն անցկացրին իրենց ազգային առաջնություններում։ Իսկ Հայկական Պրեմիեր լիգայի թիմերը լիարժեք հանգիստ և նախապատրաստվելու ժամանակ ստացան․ նոր մրցաշրջանը Հայաստանում կմեկնարկի միայն օգոստոսի 1-ին։ Սա կարող է կարևոր առավելություն դառնալ եվրագավաթների կարևոր հանդիպումներում։

«Ֆերենցվարոշ» (Հունգարիա) – «Նոա» (Հայաստան) | Չեմպիոնների լիգա, երկրորդ փուլ
Պատասխան հանդիպում․ հուլիսի 30, Բուդապեշտ
Առաջին խաղ․ «Ֆերենցվարոշի» հաղթանակ՝ 2:1

Հուլիսի 26-ին Հունգարիայի չեմպիոնը ազգային առաջնությունում մեկնարկեց ՄՏԿ-ի հետ դերբիով։ Խաղն ավարտվեց 1:1, իսկ «Ֆերենցվարոշի» միակ գնդակը խփեց Լենի Ջոզեֆը։

Գլխավոր մարզիչ Ռոբի Քինը երկու փոփոխություն կատարեց Երևանում կայացած հանդիպման համեմատ։ Պաշտպանության կենտրոնում Ստեֆան Գարտենմաննի փոխարեն խաղաց Գաբոր Շալային, ով, ամենայն հավանականությամբ, կփոխարինի որակազրկված Սիսեին։ Կիսապաշտպանությունում հայտնվեց Հաբիբ Մաիգան, իսկ Նաբի Կեյտան մեկնարկեց պահեստայինների նստարանին, սակայն դուրս եկավ խաղադաշտ 62-րդ րոպեին։

Մնացած կազմը մնաց նույնը։ Հայաստանի հավաքականի հարձակվող Էդգար Սևիկյանը կրկին խաղադաշտ դուրս եկավ խաղի վերջնամասում։ «Ֆերենցվարոշի» համար հանդիպումը բարդ ստացվեց, և թիմը չկարողացավ հաղթանակով սկսել մրցաշրջանը։

«Դյոր» (Հունգարիա) – «Փյունիկ» (Հայաստան) | Գավաթների լիգա, երկրորդ փուլ
Պատասխան հանդիպում․ հուլիսի 31, Դյոր
Առաջին խաղ․ «Փյունիկի» հաղթանակ՝ 2:1

Հուլիսի 27-ին «Դյորը» առաջնությունում խաղաց «Պակշի» դեմ և գրանցեց արդյունավետ ոչ-ոքի՝ 3:3։ Գոլերի հեղինակ դարձան Դեան Բոլդորը, Սամսիդին Օուրոն և Նֆանսու Նջիեն։ 70-րդ րոպեին Ռայմունդ Տոտը կարմիր քարտ ստացավ։

Գլխավոր մարզիչ Բալաժ Բարբելին միանգամից չորս փոփոխություն կատարեց Երևանում կայացած խաղի համեմատ։ Թիմի ավագ Պոլ Անտոնը մնաց պահեստայինների նստարանին, իսկ Տոտը, Ժելկո Գավրիչը և Ալեքսանդեր Աբրահամսոնը խաղադաշտ դուրս եկան միայն ընդմիջումից հետո։ Սկզբից խաղացին Նֆանսու Նջիեն, Լասլո Վինգլերը, Բառնաբաշ Բիրոն և Դեան Բոլդորը։

«Ունիվերսիտատյա Կլուժ» (Ռումինիա) – «Արարատ-Արմենիա» (Հայաստան) | Գավաթների լիգա, երկրորդ փուլ
Պատասխան հանդիպում․ հուլիսի 31, Կլուժ
Առաջին խաղ․ ոչ-ոքի՝ 0:0

Հուլիսի 28-ին «Ունիվերսիտատյա Կլուժը» Ռումինիայի առաջնության երրորդ տուրում խաղաց «Ունիվերսիտատյա Կրայովայի» դեմ և պարտվեց՝ 1:2։ Թիմի միակ գոլը խփեց պաշտպան Միգել Սիլվան։

Գլխավոր մարզիչ Իոան Սաբաուն հինգ փոփոխություն կատարեց Երևանի հանդիպման համեմատ։ Պաշտպանությունը մնաց անփոփոխ, իսկ հարձակման գծում Մամադու Տիամի փոխարեն խաղաց նորեկ Յովո Լուկիչը։ Կիսապաշտպանությունում հայտնվեցին Անդրեյ Ֆաբրին, Մուհամադու Դրամեն և Ալեսանդրո Մուրջիան՝ փոխարինելով Դան Նիստորին, Գաբրիել Սիմիոնին և Անդրեյ Արտեանին։ Փոխվեց նաև դարպասապահը․ Էդվինաս Գերտմոնասի փոխարեն խաղաց Ստեֆան Լեֆտերը։

«Ունիվերսիտատյա Կլուժի» առանձին խնդիր է շարունակում մնալ պաշտպանությունը․ թիմի երեք կենտրոնական պաշտպանները վնասվածք ունեն։ «Կրայովայի» դեմ խաղում կենտրոնական պաշտպանության գծում խաղաց կիսապաշտպան Դորին Կոդրեան, իսկ ընդմիջումից հետո այդ գծում հայտնվեց նաև Անդրեյ Արտեանը։

Հայկական ակումբների առավելությունը պատասխան խաղերից առաջ՞
Մինչ հայկական թիմերի մրցակիցները ուժեր են վատնում ազգային առաջնություններում, «Նոա»-ն, «Փյունիկ»-ը և «Արարատ-Արմենիա»-ն կարողացան ամբողջությամբ կենտրոնանալ եվրագավաթային հանդիպումների պատրաստության վրա։ Թարմությունն ու լրացուցիչ ժամանակը կարող են վճռորոշ լինել հուլիսի 30-31-ի խաղերում։

Սակայն այս մոտեցումն ունի նաև հակառակ կողմ․ խաղային տոնուսի պակասը և պաշտոնական հանդիպումների փոքր քանակը։ Թեև ֆիզիկական վիճակը հնարավոր է պահպանել մարզումներով, կազմի խաղարկվածությունը պահանջում է պաշտոնական հանդիպումներ։ «Նոա»-ի և «Փյունիկ»-ի համար սա քիչ էական է, քանի որ նրանք արդեն հասցրել են երեքական հանդիպում անցկացնել եվրագավաթներում։

«Արարատ-Արմենիա»-ն, սակայն, սկսեց միայն երկրորդ որակավորման փուլից և նոր մրցաշրջանում անցկացրել է ընդամենը մեկ պաշտոնական հանդիպում։ Այնուամենայնիվ, «Ունիվերսիտատյա Կլուժի» հետ առաջին խաղը ցույց տվեց, որ Մանուել Տուլիպայի թիմը լավ մարզավիճակում է և կարող է պայքար մղել պատասխան հանդիպման ընթացքում։