«Ուրարտուի» մրցակիցը հեռացվել է Կոնֆերենսիաների լիգայից. երևանցիների համար պատմական հնարավորություն է երրորդ փուլ դուրս գալու

Երևանի «Ուրարտուն» անսպասելի հնարավորություն է ստացել ակումբի պատմության մեջ առաջին անգամ դուրս գալու եվրագավաթների որակավորման երրորդ փուլ։ Այսօր հայտնի դարձավ, որ Կոնֆերենսիաների լիգայի երկրորդ փուլում հայկական ակումբի մրցակիցը՝ սլովակյան ԴԱԿ 1904 Դունայսկա Ստրեդան, հեռացվել է մրցաշարից։

Եվրոպական ֆուտբոլի միությունը (ՈւԵՖԱ) պաշտոնապես հայտարարել է սլովակական ակումբի որակազրկման մասին՝ բազմակի ակումբային սեփականության կանոնների խախտման առնչությամբ իրականացված իրավական հետաքննության արդյունքում։ Ինչպես հայտնում է ՈւԵՖԱ-ի մամուլի ծառայությունը, հեռացման պատճառ է դարձել շահերի բախումը․ ԴԱԿ 1904-ի սեփականատեր Օսկար Վիլագին միաժամանակ վերահսկում է նաև հունգարական ETO FC Győr-ը, որը նույնպես պետք է մասնակցեր Կոնֆերենսիաների լիգային 2025/26 մրցաշրջանում։

ՈւԵՖԱ-ի պաշտոնական հայտարարության մեջ նշվում է․

«Ներկայացված փաստաթղթերը ուսումնասիրելուց հետո ՈւԵՖԱ-ի Ֆինանսական վերահսկողության առաջին պալատը եզրակացրել է, որ ETO Győr-ը և ԴԱԿ 1904 Դունայսկա Ստրեդան 2025 թվականի մարտի 1-ի դրությամբ խախտել են բազմակի ակումբային սեփականության կանոնը, որը սահմանված է ՈւԵՖԱ-ի ակումբային մրցաշարերի կանոնակարգի 5.01-րդ հոդվածում»։

Ի՞նչ է սա նշանակում «Ուրարտուի» համար
Այժմ, եթե «Ուրարտուն» հաջողությամբ հաղթահարի Բելառուսի «Նեմանին» (Գրոդնո) որակավորման առաջին փուլում, հայկական ակումբը ավտոմատ կերպով կանցնի Կոնֆերենսիաների լիգայի երրորդ որակավորման փուլ։ Սա կարող է դառնալ պատմական ձեռքբերում «Ուրարտուի» համար, քանի որ թիմը նախկինում երբեք այդ փուլ չի հասել եվրագավաթներում։

Այս հնարավորությունը նոր հեռանկարներ է բացում «Ուրարտուի» առջև․ ճանաչելիության մեծացում Եվրոպայում և ակումբային վարկանիշի համար լրացուցիչ միավորներ հավաքելու հնարավորություն։

Հիշեցնենք, որ «Ուրարտուի» և «Նեմանի» առաջին հանդիպումը կկայանա հուլիսի 10-ին Երևանում, իսկ պատասխան խաղը՝ հուլիսի 17-ին Հունգարիայի Դյոռ քաղաքում։ Այժմ երևանցիների մոտիվացիան կրկնապատկվել է, քանի որ բելառուսների նկատմամբ հաղթանակը նրանց ավտոմատաբար կտանի հաջորդ փուլ առանց ուժեղ սլովակ մրցակցի հետ խաղալու անհրաժեշտության։