Սլովակյան ակումբը հետաքրքրված է Նարեկ Հովհաննիսյանի տրանսֆերով

Հայկական ԲԿՄԱ ակումբի 18-ամյա եզրային հարձակվող Նարեկ Հովհաննիսյանը կարող է իր կարիերան շարունակել Սլովակիայում։ Ինչպես տեղեկացնում է ինսայդեր Սուրեն Մելիքսեթյանը, «Դունայսկա Ստրեդա» ակումբը պաշտոնական առաջարկ է արել ֆուտբոլիստի տրանսֆերի համար, և այս պահին կողմերը բանակցություններ են վարում։

Ընթացիկ մրցաշրջանում Հովհաննիսյանը մասնակցել է 26 հանդիպման, խփել է 5 գոլ և կատարել 6 գոլային փոխանցում՝ դառնալով ԲԿՄԱ-ի առանցքային խաղացողներից մեկը Հայկական Պրեմիեր Լիգայում։ Նրա վստահ խաղը օգնեց թիմին անցկացնել իր պատմության ամենահաջող մրցաշրջաններից մեկը։ Ներկայում թիմը գտնվում է լիգայի վեցերորդ հորիզոնականում։

Բացի ակումբային ելույթներից, Նարեկը հաջողությամբ է հանդես եկել նաև միջազգային ասպարեզում՝ երկու գոլով աչքի է ընկել Հայաստանի Մ19 հավաքականում, ինչից հետո ստացել է հրավեր Մ21 հավաքական։

Հիշեցնենք, որ Սլովակիայի առաջնությունում հանդես է գալիս Հայաստանի ազգային հավաքականի ֆուտբոլիստ Տիգրան Բարսեղյանը, ով արդեն դարձել է երկրի 4-ակի չեմպիոն։ Աբով Ավետիսյանն էլ իր ակումբի հետ հաղթել է Առաջին լիգայում և հաջորդ մրցաշրջանում հանդես կգա Սլովակիայի Բարձրագույն դիվիզիոնում։