Հեքիաթ՝ երջանիկ ավարտով․ Սեմենյոն 95-րդ րոպեին գոլ խփեց և դարձավ «Մանչեսթեր Սիթիի» խաղացող
- Հեղինակ: Vahe Hakobyan
- Sportaran
Գանայի հավաքականի և «Բորնմուտի» հարձակվող Անտուան Սեմենյոն կշարունակի իր կարիերան «Մանչեսթեր Սիթիում»։ Աղբյուրների փոխանցմամբ՝ ակումբները ամբողջությամբ համաձայնեցրել են 26-ամյա վինգերի տրանսֆերը, որը մանչեսթերյան ակումբին կարժենա 75 միլիոն եվրո (մոտ 65 միլիոն ֆունտ ստեռլինգ)։ Այս գործարքը դարձել է ռեկորդային «Բորնմուտի» պատմության մեջ և կարող է ընդգրկվել 2026 թվականի ձմեռային տրանսֆերային պատուհանի ամենախոշոր տեղափոխությունների շարքում։
Կողմերի միջև բոլոր փաստաթղթերն արդեն փոխանակվել և ստորագրվել են, իսկ ֆուտբոլիստը հունվարի 8-ին Մանչեսթերում կանցնի բժշկական զննում, որից հետո կստորագրի երկարաժամկետ պայմանագիր «Սիթիի» հետ։ Նշվում է, որ Սեմենյոն նախապատվությունը տվել է Պեպ Գվարդիոլայի նախագծին՝ չնայած Պրեմիեր լիգայի ևս չորս թոփ-ակումբների հետաքրքրությանը։
Խիստ խորհրդանշական էր Սեմենյոյի հրաժեշտի հանդիպումը «Բորնմուտի» կազմում։ Տրանսֆերի շուրջ պայմանավորվածություններից հետո նա մասնակցեց «Տոտենհեմի» դեմ խաղին և դարձավ հանդիպման գլխավոր հերոսը՝ հաղթական գոլ խփելով 95-րդ րոպեին։ Այդ գոլը «Բորնմուտին» բերեց կարևոր հաղթանակ՝ 3:2 հաշվով։
«Բորնմուտի» գլխավոր մարզիչ Անդոնի Իրաոլան հուզական կերպով մեկնաբանեց իր խաղացողի քայլը.
«Նա արժանի էր այս պահին․ սա իսկական հեքիաթ է։ Ոչ ամեն խաղացող կարող է այսպես ամբողջովին նվիրվել խաղին՝ իմանալով, որ իրեն տրանսֆեր է սպասում։ Շատերը կվարվեին այլ կերպ»։
Անտուան Սեմենյոն բարձր նոտայով հրաժեշտ տվեց «Բորնմուտի» երկրպագուներին և այժմ պատրաստվում է կարիերայի նոր փուլին Եվրոպայի ամենահզոր ակումբներից մեկում։
Քննարկեք նորությունները!
Անցնել մեկնաբանություններին ↓
Comments
0