Սենսացիա Դոհայում․ Լևոն Արոնյանը պարտվեց 12-ամյա վունդերկինդին արագ շախմատի ԱԱ-ում

Կատարի մայրաքաղաք Դոհայում մեկնարկել է արագ շախմատի աշխարհի առաջնությունը, որը արդեն առաջին տուրում պարգևեց բարձրաձայն սենսացիա։ Մրցաշարի ամենափորձառու գրոսմայստերներից մեկը՝ Լևոն Արոնյանը, անսպասելիորեն պարտվեց 12-ամյա շախմատիստ Ֆաուստինո Օրոյին։

Արոնյանը, ով երկար տարիներ եղել է Հայաստանի հավաքականի առաջատարը և այժմ հանդես է գալիս ԱՄՆ դրոշի ներքո, խաղում էր սպիտակ խաղաքարերով, սակայն չկարողացավ օգտվել դիրքային առավելությունից։ Խաղի ընթացքում նա թույլ տվեց մի քանի անճշտություն, որոնցից վստահորեն օգտվեց երիտասարդ միջազգային վարպետը։ Պայքարը շարունակվեց մինչև 68-րդ քայլը, որից հետո 42-ամյա գրոսմայստերը ստիպված էր ընդունել պարտությունը։

ՖԻԴԵ-ի գործող վարկանիշում Արոնյանը զբաղեցնում է 20-րդ տեղը, սակայն մրցաշարի մեկնարկը նրա համար հեշտ չի դասավորվում․ չորս պարտիաներից հետո նա ունի 2,5 միավոր և զբաղեցնում է ընդամենը 82-րդ հորիզոնականը։ Ֆաուստինո Օրոն նույնպես ունի 2,5 միավոր և գտնվում է 72-րդ տեղում՝ շարունակելով զարմացնել շախմատային աշխարհին իր հասուն և սառնասիրտ խաղով։

Արագ շախմատի աշխարհի առաջնությունը մեկնարկել է դեկտեմբերի 29-ին Դոհայում և կավարտվի դեկտեմբերի 30-ին։