Սենեգալը և Մալին դուրս եկան Աֆրիկայի ազգերի գավաթի 2025-ի քառորդ եզրափակիչ

Հունվարի 3-ին տեղի ունեցան Աֆրիկայի ազգերի գավաթի 2025-ի 1/8 եզրափակիչ փուլի երկու հանդիպումներ։ Դրանցից մեկում Սենեգալի հավաքականը մրցեց Սուդանի հետ, իսկ Մալին՝ Թունիսի։

Զույգի ֆավորիտ համարվող Սենեգալը վստահ հաղթանակ տարավ Սուդանի նկատմամբ՝ 3:1 հաշվով, թեև հանդիպման սկիզբը անհանգստացնող էր Պապա Տյավի թիմի համար։ Արդեն 6-րդ րոպեին սուդանցիների վինգեր Ալի Աբդալլան գեղեցիկ շրջանցող հարվածով բացեց հաշիվը։

Սակայն սենեգալցիները արագ վերցրին նախաձեռնությունը և ընդմիջումից առաջ կարողացան առաջ անցնել հաշվում։ «Վիլյառեալի» կիսապաշտպան Պապ Գույեն դարձավ դուբլի հեղինակ՝ երկու անգամ հզոր հարվածելով տուգանային հրապարակի գծից։ Երկրորդ խաղակեսում Սենեգալի առավելությունն ամրապնդեց փոխարինման դուրս եկած «ՊՍԺ»-ի 17-ամյա հարձակվող Իբրահիմա Մբայեն։

Երկրորդ հանդիպման ընթացքում խաղային լարվածությունը պահպանվեց մինչև վերջ։ Մալիի հավաքականը 26-րդ րոպեից խաղում էր թվային փոքրամասնությամբ՝ Վոյո Կուլիբալիի հեռացումից հետո, սակայն Թունիսը երկար ժամանակ չէր կարողանում օգտագործել առավելությունը։ Միայն 88-րդ րոպեին Ֆիրաս Շաուատը հաշիվը բացեց թունիսցիների օգտին։

Թվում էր, թե Մալին կլքի մրցաշարը, սակայն փոխհատուցված ժամանակում Լասին Սինայոկոն 96-րդ րոպեին իրացրեց 11-մետրանոցը և խաղը տեղափոխեց լրացուցիչ ժամանակ։ Օվերթայմում հաշիվը չփոխվեց, իսկ հետխաղյա 11-մետրանոցների շարքում ավելի ուժեղ գտնվեցին մալիացիները՝ 3:2։

Աֆրիկայի ազգերի գավաթի 2025-ի քառորդ եզրափակչում Սենեգալն ու Մալին կմրցեն միմյանց դեմ։ Հանդիպումը կկայանա հունվարի 9-ին Տանժերում (Մարոկկո)։