Սելարայանը հանդիպել է Մեսսիին և նրան նվիրել «Բելգրանո»-ի մարզաշապիկը

Հայաստանի ազգային հավաքականի կիսապաշտպան Լուկաս Սելարայանը կիսվել է Լիոնել Մեսսիի հետ անձնական հանդիպումից հետո ունեցած հուզիչ զգացմունքներով։ Ֆուտբոլիստը խոստովանել է, որ կարողացել է իրականացնել իր կյանքի գլխավոր երազանքներից մեկը՝ հանդիպել լեգենդար արգենտինացուն։

Սելարայանը օգտվել է «Բելգրանո»-ի նախամրցաշրջանային հավաքների ընթացքում տրված հանգստյան օրից և մեկնել Ռոսարիո, որտեղ Մեսսին անցկացնում է իր արձակուրդը։ «Ծովահենների» (ակումբի մականունը) ավագը այցելել է Լիոնելի տուն և նրան հանձնել իր թիմի անվանական մարզաշապիկը։

Սոցիալական ցանցերում Հայաստանի հավաքականի ֆուտբոլիստը նշել է, որ այդ հանդիպումն իր համար իսկապես անմոռանալի է եղել։ Նա շնորհակալություն է հայտնել Մեսսիին ջերմ ընդունելության, ընկերական զրույցի և հատկացված ժամանակի համար՝ ընդգծելով, որ նման պահերը հավերժ մնում են հիշողության մեջ։

Սելարայանը նաև ընդգծել է Մեսսիի ազդեցությունը բոլոր նրանց վրա, ովքեր սիրում են ֆուտբոլը։ Նրա խոսքով՝ Լիոնելը համառության, համեստության և երազանքին հավատալու օրինակ է՝ ցույց տալով, որ նույնիսկ մեծության ճանապարհին չի կարելի հանձնվել՝ անկախ դժվարություններից։

«Ես իրականացրեցի իմ երազանքը՝ հանդիպեցի բոլոր ժամանակների մեծագույն ֆուտբոլիստին։ Շնորհակալություն, Լեո, որ ժամանակ տրամադրեցիր և ընդունեցիր ինձ քո տանը։ Քեզ հետ զրույցը, իմ սիրելի «Բելգրանո»-ի մարզաշապիկը քեզ նվիրելը այն պահերն են, որոնք երբեք չեմ մոռանա։

Բայց ամենակարևորը՝ ուզում եմ ասել ՇՆՈՐՀԱԿԱԼՈՒԹՅՈՒՆ, որ օրինակ և ոգեշնչման աղբյուր ես բոլորիս համար, ովքեր սիրում են այս մարզաձևը։ Շնորհակալություն, որ սովորեցրիր պայքարել երազանքների համար և երբեք չհանձնվել՝ անկախ այն խոչընդոտներից, որոնք կհանդիպեն ճանապարհիս։ Քո համեստությունն ու պարզությունը կյանքի դաս են ինձ համար», — գրել է հայ ֆուտբոլիստը սոցիալական ցանցերում։

Հրապարակումը մեծ արձագանք է առաջացրել «Բելգրանո»-ի երկրպագուների շրջանում։ Ֆանատները հաճելիորեն զարմացել են՝ տեսնելով Մեսսիին իրենց ակումբի 10 համարի մարզաշապիկով և խոստովանել են, որ չէին սպասում 2026 թվականը սկսել նման վառ կադրերով։