Հայաստանի Մ18 հավաքականը՝ Եվրոպայի բասկետբոլի առաջնության C դիվիզիոնի բրոնզե մեդալակիր

Հայաստանի երիտասարդական հավաքականը (U18) բրոնզե մեդալներ նվաճեց Եվրոպայի բասկետբոլի առաջնության C դիվիզիոնում, որը տեղի ունեցավ Ալբանիայում։ Երրորդ տեղի համար պայքարում հայ բասկետբոլիստները 81:77 հաշվով հաղթեցին Անդորրայի հասակակիցներին։

Հանդիպման գլխավոր հերոս դարձավ Սեբաստիան Ացակորզյանը, որը դաբլ-դաբլ ձևակերպեց։ Նրա հաշվին՝ 25 միավոր, 12 ռիբաունդ, 4 փոխանցում, 4 գնդի խլում և 1 բլոք։

Ընդհանուր առմամբ մրցաշարում թիմը անցկացրեց վեց խաղ, որոնցից չորսում հաղթեց․

Հայաստան – Սան Մարինո 92:59
Հայաստան – Մոնակո 69:57
Հայաստան – Կիպրոս 63:69
Հայաստան – Գիբրալթար 81:48
Կիսաեզրափակիչ․ Հայաստան – Լյուքսեմբուրգ 64:74
3-րդ տեղի խաղ․ Հայաստան – Անդորրա 81:77

Սեբաստիան Ացակորզյանը դարձավ հայկական հավաքականի ամենաարդյունավետ խաղացողը՝ միջինը հավաքելով 21,8 միավոր և 9,5 ռիբաունդ յուրաքանչյուր խաղում։ Հիշեցնենք, որ այս մրցաշարից առաջ նա պաշտպանել էր Հայաստանի Մ20 հավաքականի գույները Երևանում կայացած Եվրոպայի B դիվիզիոնի առաջնությունում։

Հիանալի մրցաշար անցկացրեց նաև Ռաֆայել Մասումյանը, որը միջինը գրանցեց 13 միավոր, 9 ռիբաունդ և 2,5 փոխանցում յուրաքանչյուր խաղում։

Այսօր Հայաստանի կանանց Մ18 հավաքականը կխաղա նույնատիպ մրցաշարի եզրափակչում՝ Վրաստանի դեմ։