Հայաստանի լակրոսի հավաքականը կմասնակցի միջազգային մրցաշարի Օրլանդոյում

Հայաստանի լակրոսի հավաքականը կմասնակցի International Sixes միջազգային մրցաշարին, որը կանցկացվի հունվարի 10–11-ը ԱՄՆ-ի Ֆլորիդա նահանգի Օրլանդո քաղաքում։

Խմբային փուլում հայկական թիմը կմրցի Ֆրանսիայի, Կոլումբիայի և Կուբայի հավաքականների դեմ։ Մրցաշարին կմասնակցեն նաև Լեհաստանի, Վիետնամի և Լյուքսեմբուրգի թիմերը։

Մրցաշարը կանցկացվի Sixes ձևաչափով՝ լակրոսի դինամիկ տարբերակով, որը ներառված է 2028 թվականի Լոս Անջելեսում կայանալիք Օլիմպիական խաղերի ծրագրում։

Հայաստանի հավաքականի կազմը ձևավորվել է ԱՄՆ-ում և Կանադայում հանդես եկող հայկական սփյուռքի ներկայացուցիչներից։ Թիմում ընդգրկված են տարբեր քաղաքների մարզիկներ, այդ թվում՝ Գլենդեյլ և Սան Դիեգո (Կալիֆոռնիա), Դալաս (Տեխաս), Նյու Յորք և Տորոնտո (Կանադա) քաղաքներից։ Թիմը ղեկավարում են մարզիչներ Թայլեր Հոլը և Ջոնի Մուրադյանը։

Այս պահին բաց է մնում բացառապես ամերիկահայ մարզիկներից կազմված Հայաստանի հավաքականի՝ օլիմպիական որակավորման փուլին մասնակցության հարցը։ Այնուամենայնիվ, այդ ուղղությամբ աշխատանքները ակտիվորեն շարունակվում են։

Նշենք, որ անցյալ տարի Հայաստանի հավաքականը հաջողությամբ հանդես եկավ Պորտուգալիայում անցկացված միջազգային մրցաշարում՝ զբաղեցնելով երրորդ տեղը։ Մանրամասները՝ հղումով։

Օրլանդոյում կայանալիք մրցաշարը կդառնա ևս մեկ կարևոր փուլ հայկական լակրոսի զարգացման ճանապարհին միջազգային ասպարեզում։