Հայաստանի ֆուտզալի ազգային հավաքականը դուրս եկավ ԵՎՐՈ-2026։ Պատմական ձեռքբերում

Առաջին անգամ պատմության մեջ Հայաստանը կմասնակցի ֆուտզալի Եվրոպայի առաջնությանը։ Որակավորման փուլում Ռուբեն Նազարեթյանի թիմը գրավեց առաջին տեղը 6-րդ խմբում՝ վաստակելով 16 միավոր։ Վճռորոշ հանդիպմանը, որը տեղի ունեցավ այսօր՝ մարտի 12-ին, Հայաստանը 4:2 հաշվով հաղթեց Ղազախստանին։

Հանդիպման հերոս դարձավ Նիկիտա Խրոմիխը, որը հեթ-տրիկ ձևակերպեց, իսկ Հայաստանի հավաքականի դարպասապահ Ալբերտ Աղաջանովը ևս մեկ գոլ խփեց։

Վեց հանդիպումների արդյունքում Հայաստանի հավաքականը տարավ հինգ հաղթանակ և մեկ խաղ ավարտեց ոչ-ոքի։

Վերջնական դասավորությունը 6-րդ խմբում

Հայաստան – 16 միավոր
Ղազախստան – 10 միավոր
Ալբանիա – 3 միավոր
Դանիա – 3 միավոր

Դանիան ու Ալբանիան դեռ կհանդիպեն իրար հետ, բայց այդ հանդիպումը խմբի ընդհանուր պատկերը չի փոխի։ Երկրորդ տեղը զբաղեցրած Ղազախստանը դեռ կարող է մասնակցել ԵՎՐՈ-2026-ին՝ անցումային խաղերի միջոցով։ Հատկանշական է, որ հենց Ղազախստանը համարվում էր խմբի ֆավորիտը, քանի որ մեծ փորձ ունի խոշոր մրցաշարերում, այդ թվում՝ ԵՎՐՈ-2016-ի բրոնզե մեդալները և 2021 թվականի աշխարհի առաջնությունում 4-րդ տեղը։

Ֆուտզալի Եվրոպայի առաջնությունը 2026 թվականին կանցկացվի Լիտվայում և Լատվիայում՝ հունվարի 18-ից փետրվարի 8-ը։