Սանդրո Պերկովիչը՝ «Դինամո Կիևի» հետ խաղի մասին. մամուլի ասուլիս Կոնֆերենցիաների լիգայի հանդիպումից առաջ

Դեկտեմբերի 18-ին Լեհաստանի Լյուբլին քաղաքում կկայանա Կոնֆերենցիաների լիգայի հիմնական փուլի 6-րդ տուրի հանդիպումը, որի շրջանակում Կիևի «Դինամոն» կհյուրընկալի Երևանի «Նոային»։

Հինգ տուրից հետո «Նոան» ունի 8 միավոր և շարունակում է պայքարը փլեյ-օֆֆ դուրս գալու համար, ինչպես նաև պահպանում է լավագույն ութնյակում հայտնվելու հնարավորությունները։ «Դինամո Կիևը», իր հերթին, արդեն կորցրել է մրցաշարում ելույթները շարունակելու շանսերը։

Խաղից առաջ «Նոայի» գլխավոր մարզիչ Սանդրո Պերկովիչը պատասխանել է լրագրողների հարցերին մամուլի ասուլիսի ընթացքում։

«Նոայի» գլխավոր մարզիչ Սանդրո Պերկովիչի մամուլի ասուլիսը

— «Լեգիայի» նկատմամբ հաղթանակից հետո դուք ասել էիք, որ 8 միավորը կարող է բավարար լինել փլեյ-օֆֆ դուրս գալու համար։ Կարողացե՞լ եք թիմին տրամադրել հաղթանակի այս խաղից առաջ։

— Ես միշտ փորձում եմ ֆուտբոլիստներին առավելագույնս տրամադրել հաղթանակի համար։ Վաղը կտեսնենք՝ ինչպես է ստացվել։ Մենք դեռ չենք հասել մեր նպատակին, բայց շատ մոտ ենք, և ամենակարևորը՝ ամեն ինչ մեր ձեռքերում է։ Սպասում եմ լավ խաղ մեր կողմից, քանի որ խաղում ենք ուժեղ ակումբի դեմ։

— Որքանո՞վ է թիմը պատրաստ խաղին «Լեգիայի» դեմ այդքան էմոցիոնալ հաղթանակից հետո։

— Այո, ճիշտ եք, նախորդ խաղը շատ էմոցիոնալ էր, և այդ զգացողությունները հեշտ չէ վերականգնել։ Սակայն մենք բավական ժամանակ ենք ունեցել պատրաստվելու համար։ Մենք գիտենք, թե ինչի համար ենք խաղում, և պատրաստ ենք։

— Ինչպիսի՞ն է ձեր կարծիքը «Դինամո Կիևի» մասին։

— Կարծում եմ՝ «Դինամո Կիևը» մեծ պատմություն ունեցող, շատ հեղինակավոր ակումբ է։ Նրանց կազմը շատ ուժեղ է, իսկ վերջերս նրանք փոխել են գլխավոր մարզչին։ Նրանք խաղում են շատ հարձակողական ֆուտբոլ՝ 4-3-3 և 4-2-3-1 սխեմաներով։ Ունեն շատ ակտիվ եզրային պաշտպաններ, ֆիզիկապես ուժեղ ֆուտբոլիստներ։ Այժմ նրանց արդյունքները նախկինի պես լավ չեն, բայց ես մեծ հարգանք ունեմ այս թիմի նկատմամբ։ Հաջողության հասնելու համար մենք պետք է ցուցադրենք նույն մակարդակի ֆուտբոլ, ինչ «Լեգիայի» դեմ խաղում։

— Վերջին շրջանում «Նոան» հաճախ է օգտագործում եզրերից փոխանցումները տուգանային հրապարակ։ Սա կապված է Նարդին Մուլահուսեյնովիչի՞ հետ։

— Չեմ կարող ասել, որ դա իմ նախընտրած ոճն է, բայց ես փորձում եմ հարմարվել կազմին և օգտագործել ֆուտբոլիստների լավագույն հատկանիշները։ Եթե ունես Նարդինի նման հարձակվող, պետք է շատ փոխանցումներ կատարես օդային պայքարի համար։ Նրա 5 գոլերը Կոնֆերենցիաների լիգայում դրա ապացույցն են։

— Վաղը չի խաղա Տիմոթի Ֆայլուլուն։ Ինչպիսի՞ վիճակում է Օգնեն Չանչարևիչը։

— Այո, Տիմոթին ազգային հավաքականում է։ Ես գոհ եմ բոլոր դարպասապահներից՝ Չանչարևիչից, Կոնեգլյանից, Պլոշչադնուց, ինչպես նաև մեզ հետ է երիտասարդ Կիմ Թովմասյանը։ Ես լիովին վստահում եմ բոլորին։ Օգնենը լավ է մարզվում, ունի մեծ փորձ և կարող է փոխարինել Ֆայլուլուին։ Ինչ վերաբերում է Հայաստանի հավաքականին, դա իմ հարցը չէ։

— Կարո՞ղ եք առանձնացնել «Դինամո Կիևի» ամենավտանգավոր ֆուտբոլիստին։

— Ես չեմ սիրում անհատապես խոսել ֆուտբոլիստների մասին, քանի որ ֆուտբոլը թիմային խաղ է, բայց եթե պետք է առանձնացնել, ապա նշեմ Անդրեյ Յարմոլենկոյին։

— Ի՞նչ էիք զգում երկրպագուների կողմից վերջին խաղից հետո։

— Ամենակարևորը՝ մենք զգում էինք նրանց աջակցությունն ու էներգիան։ Երբ պարտվում էինք 0:1, նրանք դարձան մեր 12-րդ խաղացողը։ Կարող եմ ասել, որ «Լեգիայի» հետ խաղից հետո ավելի հաճելի էր լինել «Նոայի» գլխավոր մարզիչ, քան ԲԿՄԱ-ի հետ խաղից հետո։

«Դինամո Կիև» – «Նոա» հանդիպումը կկայանա հինգշաբթի՝ դեկտեմբերի 18-ին, Լեհաստանի Լյուբլին քաղաքում, «Արենա Լյուբլին» մարզադաշտում։ Խաղի սկիզբը՝ 00:00 (Երևանի ժամանակով)։