Ռենե Ֆազել․ «Առանց կառավարության աջակցության հոկեյը Հայաստանում չի գոյատևի»

Սառցային հոկեյի միջազգային ֆեդերացիայի (IIHF) պատվավոր նախագահ Ռենե Ֆազելը մեկնաբանել է հոկեյի զարգացման հեռանկարները Հայաստանում՝ Երևանում անցկացվող Դիվիզիոն IV-ի աշխարհի առաջնության ֆոնին։

Ֆազելի խոսքով՝ առանց պետության ակտիվ ներգրավվածության ենթակառուցվածքների և սպորտային ծրագրերի աջակցման մեջ, հոկեյը հանրապետությունում ապագա չունի։

«Այո, ես կարծում եմ, որ առանց կառավարության աջակցության հոկեյը այստեղ չի գոյատևի։ Սա Հայաստանի ազգային օլիմպիական կոմիտեի և սպորտի նախարարության առաջադրանքն է՝ կենտրոնանալ երիտասարդությանը կարևոր հարցերի վրա», — նշել է Ֆազելը։

Նա ընդգծել է նաև, որ սահադաշտերի կառուցմանն ուղղված ներդրումները շահավետ կլինեն ոչ միայն հոկեյի, այլև մյուս օլիմպիական մարզաձևերի համար։

«Եթե կառուցվում է սահադաշտ, այնտեղ կարելի է զբաղվել ոչ միայն հոկեյով, այլև քեռլինգով, շորթ-տրեկով, գեղասահքով՝ և՛ տղամարդկանց, և՛ կանանց համար։ Դա ներդրում է բազմաֆունկցիոնալ սպորտային ենթակառուցվածքներում», — հավելել է IIHF-ի պատվավոր նախագահը։

Ֆազելը նշել է նաև քեռլինգի ներուժը՝ այն անվանելով «շախմատ սառույցի վրա» և տեղեկացրել, որ Քեռլինգի միջազգային ֆեդերացիան պատրաստ է տրամադրել անհրաժեշտ գույքը մարզումներն սկսելու համար։

«Քեռլինգն, ըստ էության, մտավոր սպորտաձև է։ Պետք է միայն խելամտություն և տեխնիկա։ Ինչու ոչ։ Ես չգիտեմ՝ Հայաստանում կա՞ քեռլինգի թիմ, թե՞ ոչ։ Եթե չկա՝ ուրեմն ժամանակն է ստեղծելու», — ասել է նա։

Համեմատելով այլ երկրների հետ՝ Ֆազելն ընդգծել է, որ Շվեյցարիայում, որտեղ ապրում է մոտ ութ միլիոն մարդ, կա ավելի քան 200 սահադաշտ։ Երևանի համար, որի բնակչությունը մոտ երկու միլիոն է, նա անհրաժեշտ է համարում կառուցել առնվազն 10–12 ստանդարտ սահադաշտ։

«Չի պահանջվում մեծ համալիրների կառուցում, բավական է ստանդարտ չափերի սահադաշտեր։ Դա արդեն կստեղծի համակարգային զարգացման նախապայմաններ սառցային մարզաձևերի համար», — ընդգծել է նա։