ՊՍԺ-ն ջախջախեց «Ինտերին» և առաջին անգամ նվաճեց Չեմպիոնների լիգան

Մայիսի 31-ին Մյունխենում կայացավ 2024/25 մրցաշրջանի ՈՒԵՖԱ Չեմպիոնների լիգայի եզրափակիչը, որտեղ հանդիպեցին «Փարիզ Սեն-Ժերմենը» և «Ինտերը»: Հաղթանակը տոնեց փարիզյան ակումբը, որը մինչ այդ երբեք չէր հաղթել մրցաշարում։ Հետաքրքիր է, որ Մյունխենում անցկացված նախորդ չորս եզրափակիչներում ևս գավաթը բաժին էր հասել նորեկ թիմի՝ այն թիմի, որը նախկինում երբեք չէր հաղթել Լիգայում։

ՊՍԺ-ն ցույց տվեց լիարժեք գերակշռություն և հաղթեց մրցակցին 5:0 հաշվով։

Խաղի գլխավոր հերոսը դարձավ 19-ամյա հարձակվող Դեզիրե Դուեն։ Ֆրանսիացին խփեց երկու գոլ և կատարեց մեկ գոլային փոխանցում։ Նրա փոխանցումից հետո՝ 12-րդ րոպեին, հաշիվը բացեց Աշրաֆ Հակիմին։ Ութ րոպե անց Դուեն կրկնապատկեց ՊՍԺ-ի առավելությունը։ Առաջին կեսը ավարտվեց 2:0 հաշվով, սակայն փարիզցիները չբավարարվեցին դրանով։

63-րդ րոպեին Դուեն ձգեց դուբլ, այս անգամ Վիտինյայի փոխանցումից հետո։ 73-րդ րոպեին աչքի ընկավ վրացի վինգեր Խվիչա Կվարացխելիան՝ 4:0։ Վերջնական հաշիվը՝ 5:0, ձևակերպեց Սեննի Մալուլյուն, ով խաղադաշտ մտավ փոխարինումից հետո։

Հենրիխ Մխիթարյանը սկսեց խաղը «Ինտերի» մեկնարկային կազմում և խաղաց 62 րոպե, որից հետո փոխարինվեց Կառլոս Աուգուստոյով։ Ո՛չ նա, ո՛չ թիմը չկարողացան որևէ բան անել այդ երեկո։

«Ինտերը» ավարտում է մրցաշրջանը առանց որևէ տիտղոսի։ Նախ պարտություն «Միլանից»՝ Սուպերգավաթում, ապա նորից անհաջողություն դերբիում՝ այս անգամ Իտալիայի Գավաթում։ Սերիա Ա-ում թիմը կորցրեց սկուդետոյի շանսերը «Լացիոյի» հետ ոչ-ոքիից հետո՝ նախավերջին տուրում։ Եվ վերջապես՝ այսօր՝ լիակատար պարտություն Չեմպիոնների լիգայի եզրափակչում։ Ամենուր մոտ էր, բայց ամենուր՝ ոչինչ...

Սակայն արդեն երկու շաբաթից «Ինտերն» հնարավորություն կունենա վերականգնվելու. կմեկնարկի Աշխարհի ակումբային առաջնությունը, որին կմասնակցի միլանյան ակումբը։

Թիմերի կազմերը.

ՊՍԺ. Դոննարումա – Հակիմի, Մարկինյոս, Պաչո, Նունու Մենդեշ (Էռնանդես, 78) – Նեվեշ (Զաիր-Էմերի, 84), Վիտինյա, Ֆաբիան Ռուիս (Մալուլյու, 84) – Դեմբելե, Կվարացխելիա (Ռամուգ, 84), Դուե (Բարկոլա, 63):

Ինտեր. Զոմեր – Պավար (Բիսսեկ, 53; Դարմիան, 62), Աչերբի, Բաստոնի – Դումֆրիս, Բարելա, Չալհանօղլու (Ասլանի, 70), Մխիթարյան (Կառլոս Աուգուստո, 62), Դիմարկո (Զալևսկի, 53) – Լաուտարո, Տյուրամ։