Օլիմպիական մրցանակակիր Մոհամեդ Էլսայիդը 27 տարեկանում հայտարարեց ըմբշամարտիկի կարիերան ավարտելու մասին

Տոկիոյի 2020 թվականի Օլիմպիական խաղերի բրոնզե մեդալակիր, հունահռոմեական ոճի եգիպտացի ըմբիշ Մոհամեդ Էլսայիդը հայտարարեց սպորտային կարիերան ավարտելու մասին։ 27-ամյա մարզիկը, ով բազմակի Աֆրիկայի չեմպիոն է և երիտասարդների աշխարհի առաջնությունների կրկնակի հաղթող, իր որոշման մասին հայտնել է հուզիչ Instagram գրառմամբ՝ վկայակոչելով առողջական խնդիրները։

«Շատ տարվա քրտնաջան աշխատանքի, փորձությունների և հաղթանակների, իմ երկրի անունը բարձր պահելու և օլիմպիական մեդալ շահելուց հետո՝ ես կայացրել եմ իմ մարզական կյանքի ամենաբարդ որոշումը՝ պաշտոնապես հայտարարում եմ կարիերայիս ավարտի մասին», — գրել է Էլսայիդը։

Օլիմպիական բրոնզը Տոկիոյում պատմական ձեռքբերում էր Եգիպտոսի համար՝ հունահռոմեական ոճի ըմբշամարտում առաջին մեդալը 2012 թվականից ի վեր և ընդամենը երրորդը՝ 1960-ից ի վեր։ Մեդալի ճանապարհին Էլսայիդը անցել է բարդ մենամարտերի միջով՝ հաղթելով, մասնավորապես, հայ ըմբիշ Կարեն Ասլանյանին (7։7, վերջին գործողությամբ), իսկ բրոնզե մեդալի մենամարտում՝ ռուս Արտյոմ Սուրկովին (1։1, վերջին գործողությամբ)։

Հայ երկրպագուները Էլսայիդին կհիշեն նաև 2023 թվականի աշխարհի առաջնությունում Սլավիկ Գալստյանի դեմ անցկացված դրամատիկ մենամարտով, որում եգիպտացին պարտվեց 7։8 հաշվով։

Չնայած Տոկիոյի հաջողությանը, Փարիզի Օլիմպիական խաղերն անհաջող էին նրա համար․ նա պարտվեց առաջին փուլում։

«Ըմբշամարտը ինձ համար ավելին էր, քան սպորտ․ դա իմ կյանքն էր, իմ կիրքն ու իմ հենարանը ամենածանր պահերին։ Շնորհակալ եմ Աստծուն յուրաքանչյուր րոպեի, յուրաքանչյուր հպարտության ու աջակցության խոսքի համար», — գրել է Էլսայիդը՝ շնորհակալություն հայտնելով մարզիչներին, թիմակիցներին և բոլոր աջակիցներին։