ՀՖՖ նախագահը այցելեց Երեւանում կառուցվող «Յուվենթուսի» ակադեմիա

Հայաստանի Ֆուտբոլի ֆեդերացիայի նախագահ Արմեն Մելիքբեկյանը, ԿԳՄՍ նախարար Ժաննա Անդրեասյանի եւ հայկական «Յուվենթուսի» ակադեմիայի հիմնադիր Ալֆրեդ Սադոյանի հետ միասին ծանոթացել է Ավանում կառուցվող ֆուտբոլային կենտրոնի շինարարական աշխատանքներին։

Մոտ երկու հեկտար տարածքում կառուցվում են չորս ժամանակակից խաղադաշտեր․ երկու մինի-դաշտ (20×40 մ), մեկ միջին դաշտ (40×60 մ) եւ մեկ ստանդարտ դաշտ՝ 105 մ երկարությամբ։ Նախագծի առանձնահատկությունը կլինի սպորտկենտրոնի չորրորդ հարկում նախատեսված փակ դահլիճը արհեստական ծածկույթով, որտեղ կկարողանան մարզվել կրտսեր տարիքային խմբերը ձմեռային շրջանում։ Բացի այդ, երկրորդ հարկում կկառուցվի հյուրանոցային համալիր մարզիչների եւ մարզիկների համար, ովքեր կժամանեն մարզերից։

Ակադեմիան ակտիվորեն կներառվի «Յուվենթուսի» միջազգային ծրագրերում։ Ամեն տարի Հայաստանի լավագույն երիտասարդ ֆուտբոլիստները հնարավորություն կունենան անցնելու փորձաշրջան Թուրինում, մասնակցելու մարզավարժական հավաքների եւ ակումբի ակադեմիաների հեղինակավոր Աշխարհի գավաթին։

Ալֆրեդ Սադոյանի խոսքով՝ ակադեմիայում ընդունելությունը կլինի ինչպես անվճար, այնպես էլ վճարովի հիմունքներով։ Անվճար խմբերի ընտրությունը կիրականացնի Իտալիայից հրավիրված տեխնիկական տնօրենը։ Հայաստան կժամանեն շուրջ 20 եվրոպացի մասնագետներ եւ թարգմանիչներ, ովքեր կօգնեն պատանի ֆուտբոլիստներին օտարերկրյա մարզիչների հետ հաղորդակցման հարցում։

«Իմ նախորդ այցից ի վեր այստեղ կատարվել է հսկայական աշխատանք։ Վստահ եմ, որ 2026-ին մենք ականատես կլինենք ակադեմիայի բացմանը ոչ միայն Ավանում, այլեւ «Հրազդան» մարզադաշտի հարեւանությամբ», — նշեց Արմեն Մելիքբեկյանը։

«Յուվենթուսի» ակադեմիայի պաշտոնական բացումը Հայաստանում նախատեսված է 2026 թվականին։